Хитай уйғур районида “террорлуққа аит учур тарқатқан” йәнә 15 кишини җазалиғанлиқини елан қилди

Мухбиримиз әркин
2018.05.09

Хитайниң тәңритағ тори бүгүн уйғур районида қанунсиз учур тарқитишқа четишлиқ типик 11 делониң бир тәрәп қилинғанлиқини елан қилди.

Хәвәрдин мәлум болушичә, мәзкур делоларға четишлиқ кишиләрниң сани 15 болуп, буниң ичидә 5 нәпири хитай, икки нәпири аял, делолар пүтүнләй аталмиш террорлуққа аит материялларни көрүш, сақлаш вә тарқитишқа аит мәзмунда икән. Хәвәрдә йәнә бу қетимқисиниң мушу хил типик делоларниң 13-қетим елан қилиниши икәнлики әскәртилгән.

Муһаҗирәттики уйғур көзәткүчиләр хәвәрдә қоллинилған “типик” сөзигә асасән, районда бу хил әйибләштики тутқунниң йәнила кәң-көләмдә давам қиливатқанлиқини пәрәз қилишмақта.

Норвегийәдики көзәткүчи зумрәт ханимниң баян қилишичә, хитай даирилириниң террорлуққа бу қәдәр сәзгүр муамилә қилишиниң сәвәби, өзлири районда йиллардин бери иҗра қилип келиватқан чекидин ашқан зораванлиқ һәрикәтлири билән зич мунасивәтлик.

Хитай даирилириниң уйғур районида өзлири садир қилған хаталиқлар сәвәблик әндишә ичидә яшаватқанлиқи вә ғәйрий нормал бихәтәрлик тәдбирлирини қоллиниватқанлиқини тәкитлигән зүмрәт ханим, хитайниң өз сияситини йилтизидин өзгәрмәй туруп, террор әндишисидин халий болалмайдиғанлиқини әскәртти.

Бир қисим хәлқара көзәткүчиләр, хитай тәрәпниң уйғур районидики террорлуқ тәһдитини мубалиғиләштүрүветип барғанлиқини илгири сүрүп кәлгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.