Xitay, rusiye we iran omman déngizi qoltuqida birleshme herbiy manéwir ötküzgen

“Wal strét zhurnili” gézitining xewiride éytilishiche, xitay, rusiye we iran 3-ayning 15-küni omman déngiz qoltuqida birleshme herbiy manéwir ötküzgen, bu heriket xitayning ottura sherqte öz tesir da'irisini kéngeytishke urunuwatqanliqini körsitidiken. Xitay dölet mudapi'e ministirliqimu bu manéwir arqiliq üch dölet hemkarliqini kücheytip, amérikaning bu rayonda künséri küchiyiwatqan tesiri we menpe'et xirislirigha taqabil turidighanliqini bildürgen.

Xitay, rusiye we iranning birleshme herbiy manéwir 2019-yildin buyan ötküzülüp kelgen bolup, bu qétimqisi 3-qétimliq herbiy manéwir hésablinidiken, xitay bu manéwirgha bashqurulidighan bombiliq hujumchi kémi'isini qatnashturghan.

Xitay xélidin buyan ottura sherqte küch körsitishni pilanlap yürgen bolup, 2021-yil ereb birleshme xelipilikidiki bir portta herbiy eslihelirini orunlashturghan؛ amérika istixbarat orunliri buni bayqighandin kéyin xitay bu pilanidin waz kéchishke mejbur bolghan.

Xitay terep bir qanche kün awwal iran bilen se'udi erebistan otturisida yette yil dawamlashqan diplomatik krizisni ayaghlashturushqa hesse qoshqanliqini dawrang qilishqa bashlighanidi.

Xewerde körsitilishiche, xitayning ottura sherqtiki tesir da'irisining küchiyishi amérikigha awarichilik élip kélidiken, amérika bu rayondin bir az chékinip, xitay bilen rusiyege diqqitini merkezleshtürgen peytte, xitayning bu rayonda diplomatik pa'aliyetlirini kücheytishi we birleshme herbiy manéwir ötküzüshi emeliyette amérikaning diqqitini burash, küchini parchilash rolini oynaydiken.