Хитай аманлиқ күчлири илгири бир қетимдила 17 нәпәр уйғурни етип ‍өлтүргән

Мухбиримиз әркин
2021-08-02
Share

Хитай қораллиқ сақчи қисимлириниң қәшқәрдә турушлуқ бир алаһидә уруш әтрити уйғур елидики бир қетимлиқ вәқәдә 17 нәпәр уйғурни бирақла етип өлтүргән.

"шинҗаң гезити" ниң 2-авғуст бәргән бир хәвиридә бу қәтлиамниң мәлум бир йили 7-айда йүз бәргәнлки ашкариланған, бирақ униң қайси йили, қәйәрдә йүз бәргәнлики, униң қандақ вәқәлики тилға елинмиған. Хитай даирилириниң уйғур елидә йүз бәргән адәттики наразилиқ вәқәлириниму "зораван террорлуққа" бағлап қораллиқ бастуридиғанлиқи вә униңға даир учурларни қаттиқ контрол қилидиғанлиқи мәлум.

"шинҗаң гезити" ниң хәвиридә қәшқәрдики "террорлуққа қарши туруш хәнҗири" дәп нам берилгән бир алаһидә уруш қилиш оттура әтритиниң шу қетимқи вәқәдә 17 нәпәр аталмиш "зораван террорчи" ни бир қетимдила етип өлтүргәнлики, 121 кишини тутқун қилғанлиқи билдүрүлгән.

Хәвәрдә ейтилишичә, бу әтрәт 31 қетим аталмиш чоң көләмлик "террорлуққа қарши туруш уруши" ға қатнишип һәммисидә ғәлибә қилған вә 180 нәччә қетим мукапатланғаникән. Өткән айда хитай рәһбири ши җинпиң мәзкур әтрәтни хитай мәркизи һәрбий ишлар комитети намидин мукапатлап, униңға "террорлуққа қарши туруш хәнҗири" нам бәргән.

Ши җинпиң бу намни ғәрбтики бәзи дөләтләр вә тәшкилатлар хитайни уйғурларға қарита "ирқий қирғинчилиқ" йүргүзүш, "‍инсанийәткә қарши җинайәт" садир қилиш билән әйибләп, бәзи хитай әмәлдарлириға ембарго қойған, уйғур елидә мустәқил тәкшүрүш елип берип, "ирқий қирғинчилиққа" аит хәвәр вә дәлилләрни ениқлашни тәләп қиливатқан бир вақитта бәргәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт