Тивиттер хитай әлчиханисиниң тивиттер һесабини уйғур аяллири һәққидики учури сәвәблик тақиған

Мухбиримиз ирадә
2021-01-21
Share

Тивиттер хитайниң америкада турушлуқ әлчиханисиниң һесабини йеқинда уларниң уйғур аяллири һәққидә тарқатқан учури сәвәблик тақиғанлиқини җакарлиди. Тивиттер хитай әлчиханисиниң учурини өзлириниң "инсансизлаштуруш", йәни "инсанлиқтин чиқириш" тәк қилмишларниң алдини елишқа мунасивәтлик принсиплириға хилап, дәп көрсәткән.

Ройтерс агентлиқиниң хәвиригә қариғанда, тивиттер бу һәқтики баянатида мундақ дегән: "силәрниң тивиттер учуриңлар бизниң ‹инсансизлаштуруш' қа қарши туруш пиринсипимизға хилап болғанлиқи үчүн, биз бу һәрикәтни қолландуқ. Биз бир пүтүн топлуқ яки адәмләрниң дини, ирқи, миллити вә яки башқа категорийәгә асасән ‹инсансизлаштуруш' қа йол қоймаймиз."

Хитайниң америкада турушлуқ әлчиханиси 1-айниң 8-күни тивиттердики рәсмий һесаби арқилиқ тарқатқан учурида "уйғур аяллирини бала туғуш машиниси" ға охшитиш билән биргә, уларға қаритиливатқан мәҗбурий туғмас қилиш, мәҗбурий бала чүшүрүш сиясәтлирини ақлиған иди.

Мәзкур учур америка һөкүмити вә башқа нурғун кишилик һоқуқ органлири вә паалийәтчилириниң күчлүк тәнқидигә учриғандин кейин, тивиттер хитай әлчиханисиниң учурини өчүрүвәткән. Бирақ тивиттер бүгүнки баянида мәзкур учурни хитай әлчиханиси өзиниңму өчүрүши керәкликини, әгәр ундақ қилмайдикән уларниң тивиттер һесабини әслигә кәлтүрмәйдиғанлиқини билдүргән.

Америка трамп һөкүмити ахирқи күнидә хитайниң уйғурларға йүргүзүватқан зулумлирини "ирқий қирғинчилиқ" вә "инсанийәткә қарши җинайәт" дәп елан қилғандин кейин, тивиттерниң бундақ һәрикәт қоллиниши диққәт қозғиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт