Америка җумһурийәтчиләр партийәси корона вирусиниң вухән тәҗрибиханисидин тарқалғанлиқини илгири сүрди

Мухбиримиз әркин
2021-08-02
Share

Америка җумһурийәтчиләр партийәси 2-авғуст елан қилған бир доклатида, корона вирусиниң вухән тәҗрибиханисидин тарқалғанлиқини билдүргән. Доклатта ейтилишичә, америкалиқ мутәхәссисләр хитай вә америка һөкүмәтлириниң иқтисади ярдимигә еришип кәлгән бу тәҗрибиханидики тәтқиқатчиларниң илгири корона вируслирини ‍инсанларға юқидиған шәкилдә өзгәрткәнлики вә бу хил контроллуқниң йошурун болидиғанлиқиға аит йетәрлик дәлилләр барлиқини көрсәткән.

Мәзкур доклат 2-авғуст күни америка авам палатасиниң җумһурийәтчи әзаси, авам палата ташқи ишлар комитетиниң баш әзаси майк миккал тәрипидин елан қилинған. Ройтерс агентлиқиниң хәвәр қилишичә, майк миккал дунядики 4 милйон 400 миң адәмниң өлүшини кәлтүрүп чиқарған бу вирусниң мәнбәсини мустәқил тәкшүрүшни тәләп қилған.

Хитай һөкүмити бу вирусниң шәкли өзгәртилгәнлики вә вухән тәҗрибиханисидин тарқалғанлиқи, хәлқараниң вирус мәнбәсини қайта тәкшүрүшини из‍чил рәт қилип кәлгән.

Доклатта "биз вирус мәнбәсиниң су мәһсулатлири базиридин тарқалғанлиқини пүтүләй рәт қилиш вақти кәлгәнликигә ишинимиз", "шундақла биз йәнә нурғун дәлилләр вирусниң вухән вирус тәҗрибиханисидин тарқалғанлиқини ‍спатлаватқанлиқиға ишинимиз" дейилгән. Доклатта ейтилишичә, корона вируси 2019-йили 12-сентәбирдин бурунқи мәлум вақитта тарқалғаникән. Америка президенти җов байден бу йил 5-айда америка истихбарат органлириға вирусниң мәнбәсини қайта тәкшүрүп, 90 күн ичидә өзигә доклат қилиш тоғрисида буйруқ бәргәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт