Amérika hökümiti 5 neper xitayni xakkérliq hujumi bilen eyiblep tutush buyruqi chiqardi

Muxbirimiz irade
2020-09-17
Élxet
Pikir
Share
Print

Amérika edliye tarmaqliri 16-séntebir küni besh neper xitay puqrasini xakkérliq hujumi bilen eyiblep tutush buyruqi chiqardi. Ular amérika we chet'ellerge a'it türlük ijtima'iy alaqe torliri, widiyoluq oyun shirketliri we shundaqla uniwérsitétlar we téléfon shirketliri qatarliq 100 din artuq shirket we organni nishan qilghan xakkérliq hujumlirigha chétishliq dep qaralmaqta.

Birleshme agéntliqining xewer qilishiche, bu tramp hökümitining xitayning tor jasusluq heriketlirige zerbe bérishte alghan qedemlirining bir iken. Amérika hökümiti hazir xitayning amérikadiki singip kirish we jasusluq heriketlirige qarshi jiddiy heriketke ötken bolup, amérika tashqi ishlar ministiri mayk pompéyo 15-séntebir küni "Atlantik munbiri tetqiqat merkizi" ning yighinida söz qilghanda bu nuqtini tekitligen. U "Amérika xelqi xitaydin kéliwatqan tehditni chongqur tonup yétishi kérek, hazir amérikaning yawropadiki ittipaqdashliri xitayning téxnika jasusluqi we sodidiki adaletsizliki arqiliq nechche on milyonlighan xizmettin qandaq quruq qalghanliqini tonup yetti. Xitaygha qarshi tonush hazir yawrupadila emes, sherqiy-jenubiy asiya we afriqa qit'esidimu peyda boldi," dégen.

Amérika kéngesh palata ezasi marsha blekbérn xitayning jasusluq heriketlirige qarshi aktip heriket qiliwatqan siyasiyonlarning biri bolup, u bu heqte qilghan sözide xitayning amérikadiki singip kirish we jasusluq heriketlirige qet'iy xatime bérilishi kéreklikini, xitayning amérikaliqlarning uchur bixeterliki üchün zor tehditliqini éytqan.

Bu yil 7-ayda amérika teptish xadimliri xitay hökümitige xizmet qilidighan xitay xakkérlirini, yene tajsiman wirusqa qarshi waksina tetqiq qiliwatqan shirketlerge jasusluq hujumi yürgüzüsh, dunyaning herqaysi jayliridiki shirketlerdin nechche yüz milyon dollarliq eqliy mülükni we soda mexpiyetlikige da'ir uchurlarni oghrilash bilen eyibligen idi.

Toluq bet