Америка торлирини һаклашқа четишлиқ хитай пуқраси қолға елинди

Мухбиримиз әркин
2017.08.25

Америка һөкүмити америка торлирини һаклашқа четишлиқ бир хитай пуқрасини қолға елип, униң тор бузғунлирини җасуслуқ вируси билән тәминлигәнликини илгири сүрди.

Америка әдлийә министирлиқиниң пәйшәнбә күни билдүрүшичә, шаңхәйлик хитай пуқраси йү пиңән дүшәнбә күни лос-анҗелис айродромида қолға елинған.

Әдлиийә министирлиқи йү пиңәнниң башқилар билән тил бириктүрүп, сакула намлиқ җасуслуқ вирусини қолланғанлиқини билдүрди.

Сакула җасуслуқ вируси 2014-2015-йиллири америка федирал һөкүмәт хадимлирини башқуруш ишханисиниң ториға кирип, 20 милйон федирал һөкүмәт хадиминиң архипини оғрилашта ишлитилгән. Америка әдлийә министирлиқи, тор бузғунлар гуруһиниң сакула җасуслуқ вирусини қоллинип, бирқанчилиған америка карханилириниң ториға һуҗум қилғанлиқини билдүрди.

Ройтерсниң қәйт қилишичә, америка федирал тәкшүрүш идарисиниң бир хадими, йү пиңәнниң америкидики икки шәхсни сакула вируси билән тәминлигәнликини, у бу икки шәхсниң бу вирусни америка карханилириға һуҗум қилишқа ишлитидиғанлиқидин хәвири барлиқини билдүргән. Бирақ, әдлийә министирлиқиниң әйибнамисидә федирал һөкүмәт хадимлирини башқуруш ишханисиниң ториға һуҗум қилиш вәқәси тилға елинмиди.

Ройтерсниң җүмә күни бәргән хәвиридә қәйт қилишичә, бәлки йү пиңән федирал һөкүмәт хадимлирини башқуруш ишханиси‏-опм ниң торини һаклашқа даир учурлар билән тәминлиши мумкин. Америка һөкүмәт әмәлдарлири мәзкур ишханиниң ториға һуҗум қилиш вәқәсиниң арқисида хитай һөкүмити барлиқини илгири сүрүп кәлгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.