Кирис симит: «америка хитайдики кишилик һоқуқ дәпсәндичиликигә сүкүт қилмаслиқи керәк»

Мухбиримиз ирадә
2018-04-25
Елхәт
Пикир
Share
Принт

Америка дөләт мәҗлиси әзаси кирис симит бүгүн «америка хитайдики кишилик һоқуқ дәпсәндичиликигә сүкүт қилмаслиқи керәк», деди.

Америка дөләт мәҗлисиниң тор бетидә елан қилинған мәзкур хәвәрдә ейтилишичә, дөләт мәҗлиси әзаси, дөләт мәҗлиси қармиқидики хитай ишлири комитетиниң муавин рәиси кирис симит әпәнди сәйшәнбә күни «2017-йили хитайдики кишилик һоқуқ вәзийити үчүн елип ейтқанда, интайин қараңғу бир йил болди,» дегән.

У мундақ дегән: «нобел тинчлиқ мукапатиниң саһиби лю шявбониң өлүмидин тартип, хитайдики кишилик һоқуқ адвокатлири, сиясий паалийәтчиләр вә уларниң аилилири учраватқан зомигәрликкичә шундақла миңлиған уйғурларниң тутқун қилинишиғичә хитай коммунист партийәсиниң хитай пуқралириға болған бесими һәр җәһәттин һәссиләп күчәйди. Хитайдики тенчусул билән өзини ипадә қилиш әркинлики, йиғилиш вә дини паалийәт өткүзүш әркинлики күнсайин аҗизлап маңди. Өз һакимийити мәзгилидә кишилик һоқуқни еғир дәпсәндә қиливатқан ши җинпиң өзиниң һоқуқини йәниму күчләндүрүватқан бир шараитта бизгә охшаш әркин дуняда яшаватқанлар чоқум һәрбир пурсәтни чиң тутуп, хитайдики зулумға учраватқанлар үчүн авазимизни чиқиришимиз керәк.»

Кирис симит әпәнди йәнә мундақ дегән: «дуняниң көзи биздә. Улар, америка һәқсизлиққа учраватқан, түрмиләргә соланған, тәһдиткә учраватқан вә қейин-қистақларға дуч келиватқанлар үчүн зади гәп қиламду-йоқ, дәп бизни көзәтмәктә. Америка қошма штатлири һәргизму хитай һөкүмитиниң зулумиға учраватқанлар мәсилисидә сүкүттә турмаслиқи керәк. Бизниң рәһбәрлиримиз бу мәсилини чоқум хитайниң алдида очуқ-ашкара оттуриға қоюшни давамлаштуруши керәк.»

Кирис симит хитайдики кишилик һоқуқ вәзийитигә йеқиндин көңүл бөлүватқан америка дөләт мәҗлисиниң әзалиридин бир. У йеқинда америка кеңәш палата әзаси марко рубийо билән бирликтә америкиниң хитайда турушлуқ баш әлчиси террй брандстандқа мәктуп йоллап, униң уйғур районидики «йепиқ тәрбийәләш лагерлири» ни тәкшүрүп чиқишини тәләп қилған иди.

Пикирләр (0)
Share
Толуқ бәт