«Йерусалем почтиси» ториниң хәвәр қилишичә, 500 нәпәр сабиқ парламент әзаси, алимлар, сәнәткарлар вә башқа даңлиқ әрбаблар исраилийә ташқи ишлар министири габи әшкиназиға бирләшмә мәктуп сунуп, хитайниң кишилик һоқуқ дәпсәндичиликигә қарши ениқ мәйданини билдүрүшни тәләп қилған.
Мәзкур мәктупта корона вируси һәққидә мундақ дейилгән: «хитай компартийәси вирусни йошуруш сиясити йүргүзүп, бу вирусниң пүтүн дуняға ямрап кетишини кәлтүрүп чиқирип, инсанларниң һаятиға, дуняға, җүмлидин исраилийәниң иқтисадиға еғир зиян салди. Хитай һөкүмити өзиниң мәнпәәтини дәп пүтүн дуняға хәвп йәткүзидиған һөкүмәттур.»
Хәвәрдә ейтилишичә, бу мәктупни сунушқа исраилийәдики фалунгуң тәрәпдарлири түрткә болған болған икән. Мәктуптиму хитай һөкүмитиниң фалунгуңчиларни қандақ бастурғанлиқи, уларниң ички әзалирини қандақ суғуруп алғанлиқи дегәндәк җинайәтләр тилға елинған.
Мәктупта исраилийә һөкүмитигә хитабән мундақ дейилгән: «қорқунчлуқ қирғинчилиқ аяғлашқандин кейин қурулған һәмдә бундақ җинайәт ‹әмди қайта йүз бәрмәйду' дәп җакарлиған исраилийә дөлити бүгүнки бу мәсилидә өзиниң авазини йүксәлдүрүши керәк. Мәлум сиясий вә иқтисадий мәнпәәтләр түпәйлидин сүкүт сақлашни тоғра чүшәнгили болиду. Әмма бизниңчә, һәр қандақ алий мәнпәәтни дәп йәһудийларниң тарихий мәсулийитигә сәл қарашқа болмайду.»
Мәктупта хитай билән һәмкарлишишниң пайдисидин зийини көп икәнлики, шуңа исраилийәниң мәйданини чоқум очуқ қилиши керәклики билдүрүлгән.
