Хотән вилайити “гуаңдуң сода-тиҗарити” мулазимәт тори билән һәмкарлиқ келишими имзалиған

Мухбиримиз җәвлан
2022.04.20
Share on WhatsApp
Share on WhatsApp

“шинҗаң гезити” хитайчә ториниң хәвиригә қариғанда, хотән вилайити “гуаңдуң сода-тиҗарити” мулазимәт торини башқуруватқан хуа хав мәдәнийәт, пән-техника чәклик ширкити билән һәмкарлиқ келишими имзалиған.

Келишим бойичә, “гуңдуң сода-тиҗарити” мулазимәт тори хотән қаштеши вә хотән чилинини тонуштуруп сетиш суписи билән тәминләпла қалмай, хотән саяһәтчиликини тәрәққий қилдуруш вә хотәнгә мәбләғ чақириш саһәлиридиму хотән вилайити билән һәмкарлишидикән. Икки тәрәп йәнә хотәнниң әвзәл тәбиий байлиқидин пайдилинип “хотән куенлун саяһәтчилики”, “хотән мевилири мол-һосул пәсли” темисида паалийәт уюштурушни пиланлиған.

Хуа хав мәдәнийәт, пән-техника ширкитиниң директори лу шявхуң өзидики техника әвзәллики вә ширкәтниң коллектип күчидин пайдилинип хотәнниң тәбиий байлиқлирини тонуштуруш, херидар чақириш вә хотән вилайитиниң әвзәл кәсиплирини тәрәққий қилдуруш үчүнму күч чиқиридиғанлиқини, хотәнниң әла мәһсулатлирини ичкири хитайға вә хәлқараға тонутидиғанлиқини билдүргән.

Хәвәрдә көрситилишичә, “гуңдуң сода-тиҗарити” тори әқлий иқтидар техникисини асас қилидиған, санлиқ мәлумат амбири вә рәқәмлик мулазимәт билән тәминләйдиған, мәһсулат билән базарни, һөкүмәт билән карханини бир йәргә елип келидиған сода мулазимәт суписи болуп, бу йил киргәндин буян үрүмчи, қәшқәр, алтай қатарлиқ көплигән җайлар билән сода һәмкарлиқи келишими түзүп, херидар чақириш вә базар ечиш саһәсидә паалийәт қилип кәлгән.

Уйғур райониниң вәзийитигә йеқиндин диққәт қиливатқан көзәткүчиләрниң қаришичә, “гуңдуң сода-тиҗарити” мулазимәт суписи уйғур дияридики тәбиий байлиқларни тонуштуруп, техиму көп хитай карханичилири вә содигәрләрни уйғур райониға җәлип қилишни көзләйдиған тәшвиқат көзники болуп, техиму көп хитай пуқралирини уйғур райониға берип байлиқ топлашқа, һөкүмәткә маслишип у райондики хәлқкә тәвә болған тәбиий байлиқларни талан-тараҗ қилишқа маслишиш ролини ойнайдикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.