Ақсу вилайитиниң ават вә кәлпин наһийәлири 250 нәпәрдин артуқ ярдәмчи сақчи қобул қилидикән

Бу йил киргәндин буян даириләрниң уйғур елидики сақчи күчини һәссиләп көпәйтиватқанлиқи мәлум болмақта.

Болупму уйғур елиниң хотән, қәшқәр, ақсу вә қизилсу қатарлиқ җәнубтики 3 вилайәт, бир областта бу йилниң феврал ейидин буян зор санда сақчи, ярдәмчи сақчи вә бихәтәрлик хадимлири қобул қилинишқа башлиған.

Ават наһийәлик һөкүмәт торидин мәлум болушичә, наһийәлик адәм күчи вә иҗтимаий капаләт идариси 26-май күни уқтуруш чиқирип, җәмий 160 нәпәр ярдәмчи сақчи қобул қилидиғанлиқини билдүргән.

Уқтурушта дейилишичә, қобул қилинидиған ярдәмчи сақчилар наһийә тәвәсидики һәр бир кәнт вә мәһәллиләрдә қурулған тәкшүрүш тосақлирида, йәни һөкүмәт “хәлққә қулай сақчи мулазимәт понкити” дәп атаватқан қаравулханиларда көзәтчиликтә туридикән.

26-Май күни кәлпин наһийәлик һөкүмәтму уқтуруш чиқирип, җәмий 95 нәпәр хизмәтчи хадим қобул қилидиғанлиқини, уларниң “хәлққә қулай сақчи мулазимәт понкити” да хизмәт қилидиғанлиқини билдүргән.

Һәр икки наһийәниң ярдәмчи сақчи қобул қилиш еланида җ. Х. Системисида ишләп хизмәт көрсәткән, мәмликәт бойичә сақчи нәмуниси болған яки “инқилабий қурбанлар” аилисигә мәнсуп болған намзатларниң алдин қобул қилинидиғанлиқи әскәртилгән.