Явропа иттипақи дөләтлири әлчилири хитайниң "йеңи йипәк йоли" қурулушиға қарши бирләшкән

Мухбиримиз ирадә
2018-04-18
Share

Явропа иттипақидики 27 дөләтниң бейҗиңда турушлуқ әлчилири хитайниң "бир бәлвағ бир йол қурулуши" ни тәнқид қилди.

Явропа иттипақи дөләтлири әлчилири чаршәнбә күни бир доклат тәйярлаш арқилиқ, хитайниң йеңи йипәк йоли қурулушни "мәхсус һалда явропа иттипақиниң әркин тиҗарәтни омумлаштуруш пиланиға қарши туруш, һоқуқ тәңпуңлуқини бузуш арқилиқ хитай ширкәтлиригә пайдилиқ шараит яритишни мәқсәт қилған" дәп көрсәткән.

Германийәдики иқтисад хәвәрлири тор бети болған "һанделсбәт" ториниң хәвәр қилишичә, мәзкур доклат бу йил 7-айда өткүзүлидиған "явропа-хитай алий дәриҗилик башлиқлар йиғини" үчүн тәйярланған болуп, мәзкур доклатқа явропа иттипақидики 28 дөләттин пәқәт венгирийә қол қоймиған. Әмма явропа иттипақидики 27 дөләт һөкүмәтлири хитайниң бу "йеңи йипәк йоли қурулуши" ға ортақ қарши туридиған бир истратегийә үстидә издәнмәктикән.

Хәвәрдә ейтилишичә, явропа иттипақидики бир юқири дәриҗилик әмәлдар бу һәқтә қилған сөзидә: "хитай ширкәтлири явропа иттипақи билән тиҗарәт қилимән дәйдикән биз чоқум уларниң йолсиз тәләплирини рәт қилип, өзимизниң шәртлиригә көндүрүшимиз керәк" дегән. Германийә иқтисад министирликиниң бир әмәлдари болса "йеңи йипәк йоли қурулуши чоқум барлиқ тәрәпләргә ортақ мәнпәәт бериши керәк" дәп әскәрткән.

Йеқинда америка дөләт мәҗлисидә "бир бәлвағ бир йол қурулуши" һәққидики гуваһлиқ бериш йиғинида сөз қилған мутәхәссисләр хитайниң явропа иттипақидики венгирийә, гиретсийә қатарлиқ иқтисади аҗиз дөләтләрдин пайдилинип туруп, явропа иттипақиниң хитайға қарита йүргүзүп келиватқан бир туташ сияситигә хәвп пәйда қиливатқанлиқини билдүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт