Муһапизәтчи гезити: «хитайниң йепиқ тәрбийәләш лагерлири пакистанлиқ әрләрни аяллиридин айриди»

Мухбиримиз ирадә
2018-03-15
Елхәт
Пикир
Share
Принт

Әнглийәдә чиқидиған «муһапизәтчи гезити» 15 ‏-март күни хәвәр қилишичә, пакистанниң уйғур аптоном райониға чегридаш гилгит балтистан районидики 50 тин артуқ гилгит-балтистанлиқ әр һазирғичә уйғур миллитидин болған аяллириниң из-дерикини алалмиған.

Йеқинда, гелгит-балтистан парламенти бир қарар лайиһәси мақуллап, пакистан федератсийә һөкүмитидин 50 нәпәр гелгитлиқ әрниң уйғур миллитидин болған аяллириниң« тәрбийәләш лагери»дин қоюп берилиши үчүн һәрикәткә өтүшини тәләп қилған иди. Бирақ, гилгит-балтистан парламенти әзаси җавид һүсәйин юқиридики гезиткә қилған сөзидә, пакистан федератсийә һөкүмитиниң өзлиригә техичә бир җаваб бәрмигәнликини билдүргән.

Аяли йепиқ «тәрбийәләш»кә тутуп кетилгән гелгит-балтистанлиқ әр әхмәт өзиниң аялини әң ахирқи қетим өткән йили декабирда көргәнликини, хитай даирилириниң һәтта балисини еливелишқиму йол қоймай уни җигиридин чиқиривәткәнликини вә қайта киргүзмигәнликини ейтип бәргән.

Мәзкур гезит германийәлик тәтқиқатчи адриян зензни зиярәт қилған. Адриян зенз сөзидә: «хитайниң бу һәрикитиниң чәтәлләргә чиқип баққан һәрбир кишигә қаритилғанлиқини, юқиридики бу уйғур аялларниң қутулушиниң пакистанниң җасаритигә бағлиқ болуп қалғанлиқини» ейтқан.

Әхмәт болса әгәр пакистан һөкүмити бу ишни һәл қилалмиған тәқдирдә, өзиниң бу мәсилини зорайтип гилгит-балтистанда зор намайиш уюштуридиғанлиқини, һәтта «бир бәлвағ бир йол қурулуши» үчүн интайин муһим болған чеграниму тақатқузиветишкә һәрикәт қилидиғанлиқини ейтип, «чүнки, бизгә охшаш тәқвадар кишиләр үчүн бу бизниң шәрипимизгә қилинған һуҗум болуп һесаблиниду» дегән.

Нөвәттә пакистанлиқлар билән той қилған уйғур аяллириниң омумий сани мәлум әмәс. Лекин гилгит-балтистан парламентиниң қарар лайиһәсидә көрситишичә, пакистан-хитай оттурисида импорт-експорт тиҗарити билән шуғуллинидиған 50 дин артуқ гилгит-балтистанлиқниң аяли уйғур икән. Қарар лайиһәсидә, хитай һөкүмитиниң гилгит-балтистанлиқлар билән той қилған бу аялларниң тутқан қилғанлиқини билдүргән.

Пикирләр (0)
Share
Толуқ бәт