خىتاينىڭ ھۆكۈمەت مەنبەلىرىدە پارتلاشنىڭ، 1-ئاۋغۇست پولات-تۆمۈر چەكلىك مەسئۇلىيەت شىركىتىنىڭ ئۈرۈمچى شەھىرى مەرھابا شىمالىي 1-يولىدىكى تارماق زاۋۇتىنىڭ 1-سېخىدا 11-نويابىر كېچە سائەت 11 دىن 30 مىنۇت ئۆتكەندە ئاممونىي سۇيۇقلۇقىنىڭ پارتلىشى سەۋەبىدىن يۈز بەرگەنلىكى، نەق مەيداندا 5 ئادەم ئۆلۈپ، 7 ئادەم ئېغىر يارىلانغانلىقى، ئېغىر يارىلانغۇچى بىرەيلەننىڭ دوختۇرخانىغا ئاپىرىش يولىدا جان ئۆلگەنلىكى خەۋەر قىلىندى.
ئۈرۈمچىدە 11-نويابىر كېچىدە يۈز بەرگەن پارتلاش يېقىنقى ئىككى ھەپتە ئىچىدە خىتايدا يۈز بەرگەن پارتلاشلار ئىچىدە ئادام ئۆلۈش ۋەقەسى كۆرۈلگەن يەنە بىر قېتىملىق چوڭ پارتلاش.
خىتاي دائىرىلىرى 28-ئۆكتەبىر بېيجىڭدا يۈز بەرگەن 3 ئادەم ئۆلۈپ، 38 ئادەم يارىلانغان ئاپتوموبىل بىلەن تيەنئەنمېنگە ھۇجۇم قىلىش پارتلاش ۋەقەسىنى «تېررورلۇق ۋەقەسى» دەپ بېكىتىپ، ۋەقەدىن كېيىن بېيجىڭ قاتارلىق خىتاي ئۆلكە، شەھەرلىرىدىكى ئۇيغۇرلارنى تۇتقۇن قىلغان.
ئەمما 2-نويابىر سەنشى ئۆلكىسىنىڭ تەييۈەن شەھىرىدىكى ئۆلكىلىك ھۆكۈمەت دەرۋازىسى قاتارلىق جايلاردا يۈز بەرگەن 8 قېتىملىق زەنجىرسىمان پارتلاشنى كەلتۈرۈپ چىقارغۇچىنىڭ تۈرمىدىن قويۇپ بېرىلگەن بىر خىتاي پۇقراسى ئىكەنلىكىنىلا ئېلان قىلىپ ۋەقەنىڭ خاراكتېرىنى بېكىتمىگەن ئىدى.