Җаң чүншйән тәхттин ғулиған, чен чүәнго уйғур аптоном райониниң секретарлиқиға тәйинләнгән

Мухбиримиз қутлан
2016.08.29
Share on WhatsApp
Share on WhatsApp

Хитай компартийисиниң уйғур аптоном районидики партком секретари җаң чүншйәнниң дүшәнбә күни тәхттин ғулиғанлиқи һәққидики хәвәр пүтүн дунядики чоң - кичик таратқуларда улап бесилди.

Шинхуа агентлиқиниң бу һәқтики мәхсус хәвиридә җаң чүншйәнниң уйғур аптоном райониниң партком секретарилиқ вәзиписидин қалдурулғанлиқи вә “айрим вәзипигә тәйинлинидиғанлиқи” илгири сүрүлгән.

Қизиқарлиқи шуки, тибәт аптоном райониниң партком секретари чен чүәнго үрүмчигә йөткәп келинип, җаң чүншйәнниң орниға уйғур аптоном райониниң йеңи нөвәтлик секретарлиқиға тәйинләнгән. Хәвәрдә дейилишичә, җаң чүншйән билән бир вақитта йәнә ички моңғул аптоном райони билән әнхуй өлкисиниң секретарлириму вәзиписидин елинған. Хитай компартийиси йәкшәнбә күни йәнә тибәт аптоном райони билән йүннән вә хунән өлкилириниң партком секретарлириниму алмаштурған.

Көзәткүчиләр билән сиясий анализчилар, бу қетимлиқ зор тәңшәш ши җинпиңниң хитай компартийисиниң 19 - қурултийи ечилиштин бурун өзиниң һоқуқ чәмбирикини йәниму мустәһкәмләшкә урунушиниң ипадисидур, дәп қаримақта.

Сиясий анализчиларниң қаришичә, җаң чүншйән хитай компартийиси ичидики “җяң земин гуруһи” ға мәнсуп әмәлдар болуп, бу йил 5 - айдин буян униң уйғур аптоном райониниң һакимийәт системисида йетиштүргән бир қисим йеқинлири тазиланған. Гәрчә шинхуа агентлиқиниң хәвиридә җаң чүншйәнни “башқа вәзипә” гә қойидиғанлиқи билдүрүлгән болсиму, әмма чәтәл таратқулири униң ваң лечүәнгә охшаш “йерим дәм елиш” қа чиқирилғанлиқини илгири сүрмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт