Һавай университети тутқундики зулпиқар барат өзбашниң тәқдиридин әндишә қилмақта

Мухбиримиз сада
2019-06-26
Елхәт
Пикир
Share
Принт

25-Июн һавай университетиниң оқутқучи вә оқуғучилар вәкиллири бирликтә һавай университетида җәмийәтшунаслиқ кәспи бойичә докторлуқ унваниға еришкән зулпиқар барат өзбашниң тәқдиридин әндишә қилип, бир баш мақалә елан қилди.

«Чолпан еланчилиқи» (Star Advertiser) ториниң шу күнидики саниға бесилған баш мақалидә зулпиқар барат өзбашниң һавай университетида докторлуқ унвани алған хитайдики тунҗи уйғур җәмийәтшунас икәнлики алаһидә тилға елинған. Мақалидә йәнә у оқуш пүттүргәндин кейин шинҗаң университетиниң униңға дотсентлиқ унвани билән хизмәткә қобул қилиш тәклипи әвәткәнлики, әмма һавай университетидики достлириниң униңға хитайға қайтмаслиқ һәққидә көп хизмәт ишлигәнлики, шундақ болсиму униң йәнила қайтип кәткәнлики вә узақ өтмәй тутқун қилинғанлиқи баян қилинған.

Мақалидә ейтилишичә, зулпиқар барат һавай университетиниң җәмийәтшунаслиқ факултетида уйғурларниң миллий кимлики һәққидә доклат сөзлигәндә өз исминиң хитайчә пинйин шәклини қәтий рәт қилидиғанлиқини алаһидә әскәрткән икән. У докторлуқ диссертатсийәсидә йәнә 1944-йилидики или инқилаби вә иккинчи қетимлиқ шәрқий түркистан җумһурийитигә мунасивәтлик бәзи баянларни тонуштуруп өткән икән.

Мақалидә хитай һөкүмитиниң нөвәттә уйғур диярида йүргүзүватқан уйғур миллий кимликини йоқитиш урунушлирида уйғур зиялийлири вә илим адәмлириниң асаслиқ зәрбә бериш нишаниға айланғанлиқи, бу әһвалға нисбәтән дунядики пүткүл илим игилириниң җиддий инкас қайтуруши керәклики тәкитләнгән.

Мақалидә һавай университетидики барлиқ оқутқучи-оқуғучилар вә факултет хадимлириниң зулпиқар барат өзбаш вә униң аилисиниң нөвәттики әһвалидин қаттиқ әндишә қиливатқанлиқи ейтип өтүлгән. Униңдин башқа мақалидә йәнә пикир әркинлики билән илим әркинликиниң инсанийәтниң әң негизлик кишилик һоқуқлириниң бири икәнлики, дунядики барлиқ һөкүмәтләр вә университетларниң хитай һөкүмити тәрипидин тутқун қилинған яки ғайиб қиливетилгән уйғур зиялийлириниң учурлирини сүрүштүрүши керәклики илгири сүрүлгән.

Зулпиқар барат өзбаш 2009-йили һавай университетиниң җәмийәтшунаслиқ кәспигә докторлуқ илмий унвани үчүн оқушқа киргән. У америкадики оқушини тамамлиғандин кейин үрүмчигә қайтип бир мәзгил шинҗаң университетида «тәңритағ алими» дегән түр бойичә тәклиплик тәтқиқатчи болуп ишлигән. Үрүмчидики уйғур зиялийлири арисида «илим чейи» паалийити тәшкиллигән вә иҗтимаий таратқулардики бир йүрүш лексийә вә муназирилири билән диққәт қозғиған.

Пикирләр (0)
Share
Толуқ бәт