“көз йешида нәмләнгән земин” намлиқ китаб рус вә татар тиллиридиму нәшир қилинди

Мухбиримиз үмидвар
2015-06-07
Share
koz-yeshida-nemlengen-zemin.jpg
Photo: RFA


Австралийигә берип олтурақлишип қалған сөйүнгүл җанишеф ханим язған “көз йешида нәмләнгән земин” намлиқ китабниң түркчә нәширидин башқа йәнә русчә вә татарчә тәрҗимилириму нәшир қилинип, оқурмәнләргә сунулған.

Бу әсәрниң уйғурчисиниң иккинчи нәшри оқурмәнләр билән йүз көрүшти. Китаб 1 - қетим 2006 - йили истанбул тәклимакан уйғур нәширияти тәрипидин уйғур тилида нәшр қилинған иди. 2 - Нәшри бу ай йәнә истанбулдики тәклимакан уйғур нәширияти тәрипидин қайта нәшир қилинди. “көз йешида нәмләнгән земин” намлиқ китабниң 2 - нәшри 676 бәттин, тәркип тапқан болуп, китабта апторниң 1960 - йилидин 1980 - йилиғичә болған мәдәнийәт инқилаби мәзгилидики кәчүрмишлири вә хитайларниң уйғур диярида елип барған сиясәтлири баян қилинған. Әсәрдә әйни вақиттики кишиләрниң исимлири өз пети елинған болуп, уйғурларниң йеқинқи заман сияси тарихини тәтқиқ қилиш үчүн зор әһмийәткә игә.

Китабниң аптори сөйүнгүл җанишеф ханимниң ейтишичә бу әсәрниң уйғурчиси нәшир қилинғандин кейин оқурмәнләрниң қаттиқ диққитини қозғиған, һазирғичә түрк, рус вә татар тиллириға тәрҗимә қилип тарқитилған болуп, һазир ингилиз, венгир, қазақ вә япон тиллириға тәрҗимә қилиниветиптидәк.

Мәзкур китабни шаирә нурәла гөктүрк ханим 2011 - йили түркчигә тәрҗимә қилған болуп, мәркизи истанбулда турушлуқ түрк дуняси тәтқиқат мәркизи тәрипидин нәшр қилинған иди. Русчә тәрҗимиси татаристанда тәрҗимә қилинип, русийә федератсийәси вә оттура асия түркий җумһурийәтлиридә тарқитилмақта.

“көз йешида нәмләнгән земин” намлиқ китабниң 2 - нәшриниң муқависи көк рәңдә болуп, булутлуқ асмандики бир көздин еқиватқан яшниң шәрқий түркистан земиниға еқиватқанлиқи тәсвирләнгән рәсим қоюлған. Китабниң муқависиниң ичигә аптор сөйүнгүл чанишеф ханимниң яшлиқ чеғидики рәсимлири киргүзүлгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт