Qazaqistanda milliy armiye qomandanliridin biri zunun téyipof xatirilendi

Muxbirimiz ümidwar
2017.09.24
Zunun-teyipof.jpg Milliy armiye 5-korpusqa özgertilgendin kéyinki komandirlarning süriti. Ongdin ikkinchi kishi sabiq sherqiy türkistan jumhuriyiti milliy armiyisining mu'awin bash qomandani zunun téyipof. 1950-Yili, ghulja.
RFA/Oyghan

Yekshenbe, yeni 24-séntebir küni qazaqistanning almata shehirige jaylashqan qazaqistan jumhuriyetlik Uyghur akadémiyelik tiyatirining zalida 1944-1949-yilliridiki milliy azadliq inqilabining rehbiriy erbabliridin biri, milliy armiyining mu'awin bash qomandani, milliy armiye polkowniki zunun téyipof tughulghanliqining yüz yilliqini xatirilesh pa'aliyiti bolup ötti.

Mezkur murasim zaligha zunun téyipofning généralliq herbiy formisi kiygen chongaytilghan süriti ésilghan bolup, murasimgha asasliqi yashlar, zunun téyipofning perzentliri we uruq-tughqanliri, ziyaliylardin bolup 100 ge yéqin kishi qatnashqan.

Murasimda yashlar wekilliri özlirining zunun téyipofning terjimihali we herbiy hayatigha a'it doklatlirini oqup ötken. Murasimda Uyghur tarixchilardin biri, 1944-1949-yillardiki milliy inqilab tarixi heqqide bir qisim maqalilerni élan qilghan qehriman ghojamberdi doklat bérip, zunun téyipofning 1944-1949-yillardiki milliy inqilabta we milliy armiyide oynighan roligha yuqiri baha bergen hem uning kéyinki hayat qismetliri shuningdek milliy azadliq inqilabning partlishi we aqiwiti heqqide etrapliq toxtalghan.

Yéqinqi waqitlardin buyan zunun téyipof tewellutining 100 yilliqi munasiwiti bilen qazaqistanda uning a'ile-tawabi'atliri, ziyaliylar teripidin bir qatar pa'aliyetler ötküzülgen, shuningdek uning heqqide bir qanche parche maqaliler élan qilin'ghan idi.

Zunun téyipof 1917-yili, qazaqistanning yarkent shehiride tughulghan, 1930-yillarda ghuljigha kélip makanlashqan we 1944-yili “Azadliq teshkilati” we ghulja qozghilingigha qatnashqan, 1945-yili 4-aydin bashlap, milliy armiyining mu'awin bash qomandani bolghan hemde shixu we tarbaghatay urushlirigha qomandanliq qilishqa qatnashqan. 

Zunun téyipof, 1949-yilidin 1960-yilighiche “Shinjang herbiy rayoni” ning mu'awin shtab bashliqi bolghan. U, 1961-yili sowét ittipaqigha kétip, almutada yashap, kéyin shu yerde wapat bolghan idi. Uninggha 1955-yili, xitay azadliq armiyisining général mayorliq unwani bérilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.