Heptilik xewerler (19-awghusttin 25-awghustqiche)

Erkin asiya radi'osi Uyghur bölümi heptilik xewerliri

Ürümchi yéngisheher rayonidiki Uyghurlar xitay nopusi köp bolghan 4 rayon'gha tarqaqlashturulmaqtiken

Melum bolushiche, ürümchi sheherlik hökümet 7-ayning 6-küni “Arilash olturaqlashqanlarni mukapatlash we étibar bérish siyasiti” chiqarghan.

Ürümchi shehirining tengritagh, saybagh we bulaqtagh rayonluq hökümet ishxaniliridin igilishimizche, yéqinqi ikki heptidin buyan konasheherlik rayonidiki Uyghur ahaliliri xitay nopusi köp bolghan ürümchidiki bashqa 4 rayon'gha tarqaqlashturulmaqtiken.

Igilinishiche, ürümchining yéngisheher rayoni, yuqiri tereqqiyat rayoni, bulaqtagh rayoni we midung rayonigha köchüp bérip xitaylar bilen arilash olturushni iltimas qilghuchilargha 50 ming somdin 80 ming somghiche mukapat puli bérilidiken.

Ürümchide aptomobil sétiwalghan Uyghur we qazaqlarni tekshürüp- tizimlash ishi diqqet qozghimaqta

Yéqinda ürümchi sheherlik matorluq qatnash wasitilirini bashqurush idarisi mexsus uqturush chiqirip, yéngidin aptomobil sétiwalghan Uyghur we qazaqlarni tekshürüsh hemde tizimgha élish ishini bashlighan.

Ürümchidiki alaqidar orunlar bu heqte radiyomiz ziyaritini qobul qilip, buning rastliqini delillidi we bu xizmetning jiddiy ijra qiliniwatqanliqini bildürdi.

Amérika Uyghur birleshmisining re'isi ilshat hesen ependi bu heqte inkas qayturup, buning mushu ayda bashlan'ghan ürümchi shehiridiki Uyghurlarning a'ile-tawabi'atlirini éniqlash xizmitining dawami bolushi munkinligini ilgiri sürdi.

Yeken nahiyesining 3 ming oqutquchi qobul qilish pilani pütünley xitaylar bilen toldurulghan

Yéqinda Uyghur aptonom rayonluq ma'arip nazariti höjjet chiqirip, bu yil 9-aydin bashlap rayondiki barliq bashlan'ghuch we toluqsiz ottura mekteplerde derslerning xitay tilida ötülidighanliqini uqturghan idi.

Igilinishiche, bezi nahiyeler arqa-arqidin uqturush chiqirip, xitay ölkiliridin biwasite oqutquchi teklip qilishni bashlighan. Yeken nahiyesimu 15-iyul küni élan chiqirip, pütün memliket miqyasidin jem'iy 3 ming neper oqutquchi qobul qilidighanliqini bildürgen.

Radiyomiz ziyaritini qobul qilghan yekendiki munasiwetlik tarmaqlar bu sanning xitaylarni qobul qilish arqiliq tamamlan'ghanliqini ashkarilidi.

Uyghur diyarida beden tekshürüshke qatnashmighanlar “Terbiyilesh merkizi” ge ewetilidiken

Xitay hökümitining 2016‏-yilidin buyan Uyghur aptonom rayonida élip bériwatqan omumi xelq salametlik tekshürüsh herikiti diqqet qozghimaqta.

Igilinishiche, xitay da'iriliri Uyghur diyarida bu yil 6-aydin bashlap 2-nöwetlik salametlik tekshürüsh qurulushini bashlighan bolup, buninggha jem'iy bir milyard 785 milyon som meblegh ajratqanliqi melum.

Xotendin radiyomiz ziyaritini qobul qilghan kishiler bu qétimliq beden tekshürüshining mejburiy élip bériliwatqanliqini, buni ret qilghanlarning “Yépiq terbiyilesh merkizi” ge ewetilidighanliqini ashkara qildi.

Aqtuning pilal yézisida “Ammini agahlandurush yighini” échilip, “Ikki yüzlimichilik” bilen eyiblen'gen bir diniy zat sazayi qilin'ghan

Aqtu nahiyelik hökümet torining xewirige qarighanda, bu yil 7-ayning 3-küni aqtu nahiyesining pilal yéza taziliq kentide bir meydan süren-choqan'gha tolghan “Ammini agahlandurush yighini” échilghan.

Shu küni bashqilarning chéqishturushi bilen tutqun qilin'ghan diniy zat ebeydulla yasin “Ikki yüzlimichilik” bilen eyiblinip sazayi qilin'ghan.

Aqtu nahiyesining pilal yéziliq saqchixanisidin radiyomiz ziyaritini qobul qilghan bir saqchi diniy zat ebeydulla yasinning shu küni “Yépiq terbiyelesh merkizi” ge élip kétilgenlikini bildürdi.

Qaghiliqtiki shendungluq bir xitay sodiger rayondiki éghir weziyet we Uyghurlar duch kéliwatqan bésimlardin shikayet qildi

2007-Yili shendung ölkisidin qaghiliqqa kélip shirket achqan bir xitay sodiger radiyomiz ziyaritini qobul qilip, qaghiliqtiki heddidin ziyade muqimliq tedbirliri seweblik özining tijarette ziyan tartqanliqidin shikayet qildi.

Uning bildürüshiche, shirkitidiki xizmetchilirining 70 pirsenti Uyghur bolghachqa, yerlik saqchi da'irilirining yoqilang bahaniler bilen her waqit tekshürüshige we awarichilikige duch kelgen.

U, nöwette qaghiliq bazirining közitish kaméraliri bilen tolghanliqini, öz shirkitide Uyghur xizmetchilerni dawamliq ishlitishke amalsiz qalghanliqini bildürdi.