Heptilik xewerler (22-dékabirdin 28-dékabirghiche)

Muxbirimiz eziz
2018-12-28
Élxet
Pikir
Share
Print
Yépiq "Terbiyelesh" lagéri yeni jaza lagérigha aylandurulghan 3-bashlan'ghuch mektep. 2018-Yili séntebir, lop nahiyesi.
Yépiq "Terbiyelesh" lagéri yeni jaza lagérigha aylandurulghan 3-bashlan'ghuch mektep. 2018-Yili séntebir, lop nahiyesi.
Photo: RFA

Bayin'gholin ottura sotining bash sotchisi ghalip tömürning tutqunda ikenliki ashkarilandi

Uyghurlar diyaridiki siyasiy basturushta asasliq rol oynawatqan qanun saheside Uyghur rehbiriy kadirlarning köplep tutqun qiliniwatqanliqi diqqet qozghimaqta. Yéqinda bayin'gholin ottura sotining bash sotchisi ghalip tömürning alte aydin béri qamaqta ikenliki ashkarilandi.

Muxbirimizning ehwal éniqlishi jeryanida alaqidar xadimlar ghalip tömürning tutqun qilin'ghanliqini delilligen bolsimu uning néme sewebtin tutqun qilin'ghanliqi heqqide melumat bérishni ret qildi.

Weziyettin xewerdar kishiler ghalip tömürdek qanun sahesidiki Uyghur kadirlarning nöwettiki tutqun herikitige aktip maslashmighanliqi dégendek sewebler bilen "Ikki yüzlimichi" dep eyiblen'genlikini ilgiri sürmekte.

Altayda bir qisim qazaq oqughuchilar tutqun qilishqa uchrighan

Yéqinda altay shehiri, burchin we qaba nahiyeliridiki bir qisim qazaq oqughuchilarning mektep ashxanisida choshqa göshi yéyishni ret qilghanliqi üchün tutqun qilin'ghanliqi melum boldi.

Radiyomizgha kelgen inkaslarda bir qisim mekteplerning ashxaniliridiki tamaq jedwilining éliwétilgenliki, buning bilen qaysi tamaqta choshqa göshi barliqini bilish imkani bolmighanliqtin bir qisim qazaq oqughuchilarning buninggha naraziliq bildürüp namayish qilghanliqi éytilghan.

Saqchi xadimliri bir qisim qazaq oqughuchilarning tutqun qilin'ghanliqini delilligen hemde oqughuchilarning naraziliq heriketlirige taqabil turush üchün bixeterlikni kücheytish heqqide yuqiridin uqturush chüshkenlikini étirap qilghan bolsimu, emma naraziliq namayishi bolghanliqini inkar qildi.

Uyghurlar mesilisi gherb taratqulirida izchil muhim xewerlerdin bolup kelmekte

Uyghurlarning pütün millet boyiche "Étnik tazilash" qa duch kélishi ötken heptide firansiye, rusiye, amérika qatarliq döletlerdiki téléwiziye qanalliri we gézit-zhurnallirida oxshimighan shekillerde mexsus témilar boyiche tonushturuldi. Bir qisim tonushturushlar we maqalilerde xitaydiki Uyghurlargha qaritilghan bu xil basturushlarning "Étnik tazilash" ' xaraktérige ige ikenliki körsitildi.

Bolupmu "Zimistan" zhurnili Uyghurlar diyaridiki lagérlarning ichki ehwalini köpligen maddiy pakitlar bilen pash qilip, xelq'aragha Uyghur diyarining nöwettiki ehwalini échip körsitishte aktip rol oynidi.

Buninggha mas halda Uyghur siyasiy pa'aliyetchilermu herqaysi dangliq axbarat qanallirida mexsus témidiki söhbetlerge ishtirak qilip, Uyghurlar uchrawatqan dehshetlik siyasiy basturushlargha tepsiliy chüshenche berdi.

Dunyaning herqaysi jaylirida Uyghurlarni qollash namayishi bolmaqta

Herqaysi axbarat wasitilirining Uyghurlar duch kéliwatqan basturushlar heqqidiki melumatliri seweblik dunyaning oxshimighan jaylirida lagérlargha qarshi türlük namayishlar otturigha chiqti.

Ötken heptide hindonéziyediki musulmanlarning Uyghurlarni qollash namayishigha ulapla qirghizistan, türkiye, gérmaniye, tataristan qatarliq jaylardiki her sahe kishiliri xitay hökümitining Uyghurlarni basturush herikitige qarshi mezmundiki lozunka we plakatlarni kötürüp her xil kölemde namayish ötküzdi.

Türkiyediki öktichi partiyelerdin "Büyük birlik partiyesi" paytext enqerede zor yighilish we namayish teshkillep, türk xelqige Uyghurlar uchrawatqan zulumni yene bir qétim esletti. Hindonéziyediki namayishning kölimimu zor boldi.

Doktor burhan séti türkiyening dölet mukapatigha érishti

Türkiye penler akadémiyesining 2018-yilliq ijtima'iy pen we tebi'iy pen sahesidiki munewwer yash ziyaliylarni bahalash pa'aliyitide Uyghurlardin doktor burhan séti mukapat sahiblirining biri bolup tallandi.

Enqere shehiridiki mukapat tarqitish murasimida türkiye jumhuriyitining re'isi rejep tayyip erdoghan mukapat longqisini burhan sétigha öz qoli bilen tapshurup berdi.

Melum bolushiche, burhan séti bu qétim islam iqtisadi we pul-mu'amile sahesidiki izdinishliri bilen bu mukapatqa érishken iken.

Amérika siyasiyonliri yéngi "Uyghur qanun layihesi" teklipini otturigha qoydi

Uyghur jem'iyiti duch kéliwatqan türlük krizislar dunyaning diqqitini qozghawatqanda amérika dölet mejlisining bir qisim ezaliri "Uyghurlargha ige chiqish we dunyawi insanperwerlikning ortaq inkasi" mawzuluq qanun layihesini tüzüp chiqish teklipini otturigha qoydi.

Mezkur qanun layihiside yuqiri pen-téxnikilarni xitaygha sétip bériwatqan shirketlerni cheklesh asasiy mezmun qilin'ghan bolup, buninggha jumhuriyetchiler we démokratchilar partiyesidin bolghan siyasiyonlar imza qoydi.

Mezkur qanun teklip layihesining otturigha qoyulushi amérika dölet mejlisige Uyghurlar heqqidiki qanun layihesi sunulghandin kéyinki yene bir chong ilgirilesh bolup, Uyghurlar mesilisining xelq'aralishishida zor ehmiyetke ige iken.

Toluq bet