Түркийәдә уйғур ашханилири күнсайин көпәймәктә

Ихтиярий мухбиримиз әркин тарим
2014.09.19
yuksel-uyghur-restoran-turkiye.jpg Түркийәниң пайтәхти әнқәрәдә йүксәл уйғур ресторани намида уйғур ашханиси ечилди. 2014-Йили сентәбир.
RFA/Erkin Tarim

Уйғурларниң түркийәгә көпләп келишигә әгишип, түркийәниң чоң шәһәрлиридә ечилған уйғур ашханилириниң саниму күнсайин көпәймәктә. Түркийәниң пайтәхти әнқәрәдә йүксәл уйғур ресторани намида йәнә бир уйғур ашханиси ечилди. Ашханида ләзиз уйғур тамақлириниң пүтүн хиллири бар болуп, әнқәрәдә уйғурлар аз болсиму, оттура асиядин кәлгән түркий милләтләр вә йәрлик түркләр бу тамақларни яқтуруп йейишмәктә.

Әнқәрәдики йүксәл уйғур ресторани шәһәр мәркизи йеқинидики зия көкалп кочиси 76-номурлуқ бинада болуп, бу ашхана әнқәрәдә яшаватқан оттура асия түркий җумһурийәтлиридин кәлгән оқуғучиларниң топлинидиған җайиға айланған. Биз игилигән мәлуматларға асасланғанда, һазир түркийәниң истанбулда 14, әнқәрә шәһиридә 2, анталя шәһиридә 2 уйғур ашханиси бар болуп, җәмий 18 ашхана ечилған. Мутәхәссисләрниң ейтишичә, бу, уйғур тамақлириниң хәлқаралишиватқанлиқиниң бешарити икән.

Биз әнқәрәдики йүксәл уйғур ашханисида тамақ йәватқан кишиләргә микрофонимизни узитип уларниң уйғур тамақлири тоғрисидики көз қарашлирини игилидуқ. Һүсәйин исимлик бир түрк херидар 30ға йеқин дөләткә берип, у дөләтләрниң тамақлирини йегәнликини, әмма уйғур тамақлириниң тәминиң алаһидә икәнликини ейтти. Давамлиқ бу йәрдә тамақ йәватқан бир өзбек херидар уйғур тамиқи йегән вақтида өзини өзбекистандикидәк һес қилғанлиқини баян қилди. Бир уйғур ашпәз уйғурларниң тамақлириниң интайин ләзиз вә озуқлуқ җәһәттинму яхши икәнликини, әмма уйғурлар сиясий сәвәбләр түпәйли чәтәлгә чиқалмиғачқа, уйғур тамақлирини хәлқараға тонутушта кәч қалғанлиқини баян қилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.