Misirdin qaytqan 12 yashliq hezriti'eli memetning nezerbend astida ikenliki ashkarilandi

Muxbirimiz bügün, ilgiri yurtidiki dadisi we akisi tutqun qilin'ghan, misirda oquwatqan oqughuchi ibrahim memetning misirdiki téléfoni élinmighandin kéyin, uning iz-dérikini élish üchün, yopurgha yekshenbe bazargha qarita téléfon ziyariti élip bardi. Ziyaret dawamida ibrahim memet heqqide héchqandaq uchur élinalmidi, emma misirdin bu yil 2-ayda qaytqan 12 yashliq hezriti'eli memetning bir mehel tutup turup tekshürülgenliki we nöwettimu nezerbend astida ikenliki ashkarilandi.

Ashkarilinishiche, hezriti'eli memet dadisi memet ablet we apisi bilen birlikte, ötken yilning axiri misirgha kelgen. Ular misirgha kélip uzun ötmey , misirdiki Uyghurlar arisida yurtigha qayturulush ensizchiliki tughulghan. Eslide yopurgha yekshenbebazar yézisining 3-kent 8-mehelliside olturushluq bolghan, birnechche yildin béri ürümchide tijaret qiliwatqan memet ablet oghli hezriti'eli memetni ezherde oqutush arzusi sugha chilashqandin kéyin, bu yil 2-ayda yurtigha qaytqan. 

Hörmetlik radi'o anglighuchilar, yopurgha yekshenbe bazardiki saqchi we kent kadirliridin igilen'gen yuqiriqi uchurlardin 12 yashliq hezriti'eli memetning kentte nezerbend astida ikenliki melum, emma uning dadisi memet ablet bilen anisining nede ikenliki we ulargha qandaq jaza kelgenliki hazirche melum emes. 

Özini ashkarilashni xalimighan kent ahalilirining perez qilishiche, da'iriler hezriti'eli memetni misirda körgen-bilgenlirini dost-buraderlirige sözlep bérishtin tosush üchün we yaki uning éghizidin misirdiki Uyghurlargha alaqidar yéngi uchurlarni igilesh üchün uni nezerbend qilghan bolushi mumkin.