Saxawetchi nurtay hajimning 6 aydin béri qamaqta ikenliki delillendi

Muxbirimiz shöhret hoshur
2018-10-26
Élxet
Pikir
Share
Print
Nurtay hajim mektipidiki oqughuchilar bilen birge. Ghulja.
Nurtay hajim mektipidiki oqughuchilar bilen birge. Ghulja.
Oqurmen teminligen

Birqanche aydin béri ijtima'iy taratqularda ghuljidiki meshhur xeyr-saxawetchi nurtay hajimning tutqun qilin'ghanliqi heqqide uchur tarqalghan idi. Muxbirimizning éniqlashliri dawamida nurtay hajimning az dégende 6 aydin béri qamaqta ikenliki we 4 ayning aldida bir qétim sotqa chiqqanliqi delillendi.

Xitayning "Sina" torida saqlan'ghan bir maqalida tonushturulushiche, 1950‏-yillarda tughulghan nurtay hajim 1980‏-yillarning otturiliri import qilin'ghan mashinilarni rémont qilish mulazimiti bilen shughullinip igilik tikligen. 1990‏-Yillarda ‏ghuljida chégra sodisi bashlan'ghanda u xelq'ara sayahet we yük toshush shirkiti qurup, sodida saheside qed kötürgen. U 1995 ‏-yili 3 milyon 800 ming yüen meblegh sélip, bir yétim-yésirlar mektipi achqan. "Nurtay iskender yétimler mektipi" dep atalghan bu mektepte Uyghur diyarining xoten, qeshqer qatarliq herqaysi jayliridin 150 che oqughuchi oqush we yashash imkanigha érishken. Yene shu maqalida déyilishiche, nurtay hajim her yili oqughuchilarning turmush we oqush xirajiti üchün bir milyon 150 ming yüen xirajet ajratqan iken.

Uyghur jem'iyitidiki balilar we ma'ariptin ibaret diqqetke sazawer bu wezipini teshebbuskarliq bilen üstige alghan saxawetchi nurtay hajim bu yil 4‏-ayda qazaqistandiki bir tijaret sepiridin qaytqanda ün-tinsiz ghayib bolghan. Weziyettin xewerdar bir kishining bayan qilishiche, uning a'ile ezaliri we uruq-tughqanliri xéli mezgilgiche uning iz-dérikini alalmighan. Buningdin 4 ayche ilgiri uning sotlan'ghanliqi we 18 yilliq késilgenliki heqqide jem'iyette gep tarqalghan. Weziyettin xewerdar kishi nurtay hajimning ehwalini bilip béqish üchün uning uruq-tughqanlirigha téléfon qilghan bolsimu, emma héchqaysisi nurtay hajimning teqdiri heqqide éghiz échishqa jür'et qilalmighan. 

Buningdin birnechche ay ilgiri amérikida pa'aliyet élip bériwatqan "Di'alog fondi" namidiki bir kishilik hoquq teshkilatining xitayche tor bétide ghuljida bir türküm sodigerlerning sotlan'ghanliqi, sotlan'ghanlar arisida saxawetchi nurtay hajimningmu barliqi tilgha élin'ghan. Biz bu uchurlarning toghra-xataliqini éniqlash üchün ghuljidiki idare-organlar we saqchixanilargha téléfon qilduq. Herembagh saqchixanisining xadimi "Nurtay iskender yétimler mektipi" ning taqilip ketkenlikini ashkarilidi. Bu xadim nurtay hajimning qanche yil késilgenlikini dep bermigen bolsimu, emma uning deryaboyi yoli saqchixanisi teripidin tutulghanliqini yoshurmidi. Weziyettin xewerdar kishi nurtay hajimning tutulush sewepliridin biri süpitide uning yétimler mektipige bir qanche siyasiy mehbusning perzentini qobul qilip qalghanliqi ikenlikini bayan qilghan idi. Saqchi xadimi bu heqte melumat élish üchün deryaboyi saqchixanisidin ehwal igilishimizni tewsiye qildi. Deryaboyi saqchixana xadimimu nurtay hajim délosi heqqide melumat bérishtin özini qachurdi. Saqchixanining siyasiy yétekchisi nurtay hajimning buningdin 4 ay awwal sotlan'ghanliqini bayan qildi. Emma umu uning üstidin chiqirilghan höküm heqqide melumat bérelmidi. 
Hörmetlik radi'o anglighuchilar, weziyettin xewerdar kishi nurtay hajimning sot meydanigha koyza-kishenler bilen élip chiqilghanliqi we 18 yilliq késilgenlikini ilgiri sürgen idi. Emma oblastliq saqchi idarisining xadimi nurtay haji üstidin 4 ay awwal échilghan sotning netijisi heqqide melumat bérishni keskin shekilde ret qildi.
Eng yéqinda ghuljidin igilen'gen bir gheyriy resmiy uchurda nurtay hajimning téxiche qamaqta ikenliki, délosining dawamliq tekshürülüwatqanliqi, sotning téxi axirqi hökümni chiqarmighanliqi ilgiri sürülgen.

Toluq bet