Sha'ir abduqadir jalalidinning ürümchidiki midong rayoni “Terbiyilesh merkizi” de ikenliki ilgiri sürülmekte

Ataqliq sha'ir we edib abduqadir jalalidinning tutqun qilin'ghanliqi delillen'gendin kéyin, muxbirimiz u tutup turuluwatqan orun we atalmish xataliqi üstide éniqlash élip bardi. Uning xizmet orni bolghan shinjang pédagogika uniwérsitétining alaqidar xadimliri uning ürümchidiki midong rayonluq “Terbiyilesh merkizi” de bolush éhtimalliqini ilgiri sürdi.

Shinjang pédagogika uniwérsitétning intizam tekshürüsh komitéti xadimi proféssor abduqadir jalalidinning tutulush mesilisining nazuk bir mesile ikenlikini, shunga mekteptiki köp qisim xadimlarning ehwaldin, bolupmu uning nede, néme sewebtin tutup turuluwatqanliqidin xewersizlikini éytti. Ehwaldin xewerdar xadimlar, abduqadir jalalidinning tutup turuluwatqan orni heqqide uniwérsitét saqchixanisining xewiri barliqini éytti. Emma bu saqchixana xadimimu, ehwalning addiy emeslikini, alaqidar rehbiri xadimlardin ehwal igilishimizni tewsiye qildi. 

Uniwérsitét qoghdash bashqarmisi we tengritagh rayonluq saqchi xadimliri, abduqadir jalalidin heqqide melumat bérelmeydighanliqini éytish bilen birlikte, ürümchide atalmish “Terbiyilesh” dolquni dawam qiliwatqanliqi, hetta “Terbiyilesh merkizi” dep bir orunning barliqinimu inkar qildi. Biz uninggha shinjang xelq radi'o istansisining radikalliqni tügitish we terbiyilep özgertishke a'it xewerlirini esletkinimizde, özlirining xewer körmeydighanliqini, bu témida héchnéme dep bérelmeydighanliqini éytti. Shinjang pédagogika uniwérsitéti qoghdash bölümining bir mes'uli, bu témida tepsiliy jawab bérelmeydighanliqini bildürüsh bilen birlikte, abduqadir jalalidinning ürümchidiki eng chong lagérlardin biri bolghan “Midongchü terbiyilesh merkizi” de bolush éhtimalliqini ilgiri sürdi.

Aldinqi künki éniqlashlirimiz dawamida, shinjang pédagogika uniwérsitéti amanliq bashqarmisi siyasiy bölümining bashliqi féng wéychyang, abduqadir jalalidinni ürümchi sheherlik dölet amanliq saqchiliri 29-yanwar küni tutup ketkenlikini ashkarilighan idi.