Dangliq neshriyatchi we yazghuchi abduraxman ebeyning tutqunda ikenliki delillendi

Muxbirimiz shöhret hoshur
2018-10-12
Élxet
Pikir
Share
Print
Dangliq Uyghur neshriyatchi, yazghuchi abduraxman ebey.
Dangliq Uyghur neshriyatchi, yazghuchi abduraxman ebey.
ts.cn

Yéqinda weziyettin xewerdar kishilerdin biri radiyomizgha uchur yollap, Uyghur aptonom rayonida edebiyat-sen'et saheside tutqun qilin'ghan 6 neper tonulghan shexsning xizmet orni, turushluq yéri we alaqidar kishiliri heqqide melumat yollighan idi. Muxbirimizning bu uchurgha asasen éniqlashliri dawamida bu 6 kishidin shinjang xelq bash neshriyatining sabiq bashliqi, tonulghan yazghuchi abduraxman ebeyning atalmish "Bölgünchilik we diniy esebiylik gumani" bilen tutqun qilin'ghanliqi we tekshürülüwatqanliqi shinjang yash-ösmürler neshriyatidiki bir nöwetchi xitay xadim teripidin delillendi.

Hörmetlik radi'o anglighuchilar, Uyghur jem'iyitide keng tonulghan yazghuchi, neshriyatchi abduraxman ebey heqqide tor arxiplirida saqlan'ghan matériyallarda körsitilishiche, u 1953‏-yili tughulghan. 1977‏-Yilidin bashlap neshriyatchiliq bilen shughullan'ghan. 1980‏-Yillarda "Tarim ghunchiliri" zhurnilining bash muherriri, 1999‏-yili shinxu'a kitabxanisining bash diréktori, 2005 ‏-yilidin 2015 ‏-yiligha qeder shinjang xelq bash neshriyati partikomining mu'awin sékrétari, neshriyat bashliqi bolup wezipe ötigen.

2011 ‏-Yili u xitay axbarat axbarat wastilirida "Shinjangning jushqun neshriyatchisi" dep tonushturulghan. Abduraxman ebeyning yéziqchiliq kespiy sewiyisi, memuri we igilik bashqurush iqtidarigha yuqiri baha bérilgen mezkur maqalida abduraxman ebeyning 2003‏-yilidin 2011‏-yiligha qeder neshriyatchiliq saheside her yili dégüdek memliket derijilik mukapatlargha érishkenliki, bir qétimliqta memliket boyiche "Ilghar neshriyat emeldari" bolup bahalan'ghan tilgha élin'ghan.

Weziyettin xewerdar bir kishining bu hepte radiyomizgha inkas qilishiche, neshriyatchiliq saheside ene shundaq xizmet körsetken abduraxman ebey bu yil 7‏-ayda tutqun qilghan. Emma inkasta abduraxman ebeyning qandaq bir guman bilen tutulghanliqi we délosining nöwettiki ehwali tilgha élinmighan. Biz bu uchurning toghra-xataliqini aydinglashturush üchün shinjang Uyghur aptonom rayonluq partkom, intizam tekshürüsh komitéti, teshkilat bölümi, medeniyet nazariti we shinjang xelq neshriyati qatarliq orunlargha téléfon qilduq. Téléfonimizni qobul qilghan shinjang yashlar-ösmürler neshriyatining nöwetchi bir neper xadimi abduraxman ebeyning tutqun qilin'ghanliq xewirining toghriliqini delillidi.

Abduraxman ebeyning tutqun qilin'ghanliqini yuqiri derijilik idare-organlardiki hemme kishining bilidighanliqini ipadiligen bu xadim uning bir "Bölgünchilik we diniy esebiylik" délosigha chétilip qalghanliqini bayan qildi. U abduraxman ebeyning tekshürülüsh üchün xéli burunla tutqun qilin'ghanliqini bildürdi. Bu xadim yene abduraxman ebeyning mezkur "Xataliq" ni yashlar-ösmürler neshriyatida ishlewatqan waqtida emes, belki xelq neshriyatida ishlesh jeryanida ötküzgenlikini ilgiri sürdi. U yene abduraxman ebeyning tutup turulup tekshürülüwatqanliqi heqqide ichki jehette bir uqturush tarqitilghanliqini ashkarilidi.
Bu xadim gerche abduraxman ebeyning délosidin tepsiliy xewiri barliqini ipadiligen we bu heqte toluq melumat bérishke intilgen bolsimu, emma téléfon söhbitimiz namelum téxnikiliq tosalghu sewebidin dawam qilalmidi. Ikki qétim baghlan'ghan, her ikki qétimi bir minuttin artuq sürelmigen téléfon baghlinishimiz üzülüp ketkendin kéyin, oxshash nomurgha qayta-qayta urghan bolsaqmu, téléfon qayta baghlanmidi.

Biz abduraxman ebeyning eng yéqinqi ehwalini éniqlash üchün xitayche tor arxiplirini tekshürüp körduq. "Beydu uchur ambiri" da bayan qilinishiche, u 2015‏-yili 1‏-ayda shinjang xelq neshriyatining bashliqliq wezipisidin qaldurulup, Uyghur aptonom rayonluq siyasiy kéngesh tarix matériyallirini tetqiq qilish ishxanisining mudirliqigha teyinlen'gen, 2017‏-yili 1‏-ayda bu wezipisidinmu qaldurulghan. Weziyettin xewerdar kishi radiyomizgha yetküzgen uchurida abduraxman ebeyning 2015‏-yildin bashlapla xitayning neziride "Gumanliq shexs" ke aylan'ghanliqi we alaqidar organlar teripidin pat-pat soraqqa tartilip turghanliqi eskertilgen 

Tordiki ün-sin arxiplirini tekshürginimizde abduraxman ebeyning muqimliq heqqide qilghan sözliridin töwendiki jümliler melum boldi. 

". . . Shinjangning muqimliqi we tereqqiyati üchün milletler ittipaqliqigha a'it kitablar köprek neshr qilinishi, qanun'gha a'it matériyallar köprek neshr qilinishi, déhqanlarning turmushigha paydiliq matériyallar köprek neshr qilinishi kérek. . ."

Xitay torlirida élan qilin'ghan "Shinjangning jushqun neshriyatchisi" mawzuluq maqalida neqil élinishiche, shu yili 59 yashqa kirgen abduraxman ebey özining köngül sözlirini bayan qilip pakiz ish qilishni, pak adem bolushni we buning netijiside rahet pénsiyige chiqishni arzu qilidighanliqini bildürgen. Emma bügünki delilleshlerdin melum bolushiche, bir ömür neshriyatchiliq saheside ter tökken yazghuchi, neshriyatchi abduraxman ebey bu yil 65 yéshida qoligha koyza sélinip we belkim béshigha qara xaltimu kiydürülüp "Tekshürüsh" ke élip kétilgen. Uning nöwette nede tutup turuluwatqanliqi yaki délosining qaysi basquchta ikenliki melum emes. 

Hörmetlik radi'o anglighuchilar, weziyettin xewerdar kishining abduraxman ebey heqqide radiyomizgha yetküzgen uchurida "Jallat xénim", "Bahadirname" qatarliq nadir tarixiy romanlarning aptori yasinjan sadiq choghlan, shinjang sen'et institutining proféssori qéyum muhemmed, shinjang téléwiziye istansisining rézhissori, sha'ir muxter bughra, xelq ichide tonulghan zamaniwi naxsha cholpanliridin hezriti'eli memtili we shinjang téléwiziye istansisining riyasetchiliridin zulpiqar küresh bu yilning béshidin hazirgha qeder oxshimighan waqitlarda tutqun qilin'ghanliqini ilgiri sürülgen.

Toluq bet