Германийәдә "барин вәқәси" ниң 28 йиллиқини хатириләш намайиши өткүзүлди

"барин вәқәси" ниң 28 йиллиқини хатириләш мунасивити билән өткүзүлгән намайиштин көрүнүш. 2018-Йили 5-апрел, германийә.

5-Апрел күни германийәниң мюнхен шәһиридә буниңдин 28 йил муқәддәм йүз бәргән "барин вәқәси" ни хатириләш намайиши өткүзүлди.

5-Апрел күни мюнхен шәһиридики хитай консулханиси алдида өткүзүлгән бу намайишни "явропа шәрқий түркистан бирлики" тәшкиллигән болуп, намайишқа мюнхен вә йеқин әтраптики шәһәрләрдин кәлгән көп сандики уйғур җамаити қатнашти.

Намайиш башлиниш алдида мюнхен шәһиридики уйғур мойсипитлири вә сиясий актиплири алди билән "барин вәқәси" ниң җәряни, тарихий әһмийити, уни һәр йили хатириләшниң муһимлиқи һәққидә уйғур җамаитигә чүшәнчә берип өтти.

Бу қетимлиқ намайиш җәрянида "явропа шәрқий түркистан бирлики" ниң рәиси турғунҗан алавудун әпәнди зияритимизни қобул қилип, "барин вәқәси" ни хатириләш намайишини уюштуруштики мәқсәтләр һәққидә тохталди.

Мәзкур тәшкилатниң муавин рәиси әсқәрҗан әпәнди герман җамаитигә "барин вәқәси" һәққидә мәлумат бәрди. Намайиш җәрянида мюнхендики җамаәт әрбаблиридин аблимит турсун әпәндиму сөз елип, хитайниң аталмиш "йепиқ тәрбийәләш мәркизи" намидики йиғивелиш лагерлирида давам қиливатқан еғир зулумларни баян қилип өтти.

Намайишчилар намайиш җәрянида уйғурчә, германчә, хитайчә шоарларни товлап, хитай консулханиси алдини ләрзигә салди. Мюнхендики уйғур җамаәт әрбаблиридин зебибулла әпәнди зияритимизни қобул қилғанда, уйғур миллитиниң "барин вәқәси" ни әбәдий унтумайдиғанлиқини әскәртти.

Бир йерим саәт давамлашқан бу намайишқа шәрқий түркистанниң ай-юлтузлуқ көк байрақлири билән түрлүк лозункилар елип келингән болуп, лозункиларға йезилған шоар вә бәлгиләр кочидин өткән-кәчкән герман җамаитигә уйғурлар нөвәттә дуч келиватқан зулумларни аңлитиш ролини өтиди.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар