Xitay, bay kömürkan hujumini 63 kündin kéyin yétersiz halda xewer qildi

Aqsu bayda yüz bergen soghan kömürkan hujumini ikki aydin béri keskin halda ret qilip kéliwatqan xitay da'iriliri,20 - noyabir küni, yeni weqe yüz bérip 63 kündin kéyin dölet axbarat orgini bolghan “Tengritagh tori” da resmiy élan qildi, emma xewerde weqening tepsilati yenila kemtük we éniqsiz. Xitay mezkur xewiride, xitay eskerliri teripidin öltürülgen hujumchilar sanini 28, dep élan qildi. Emma xewerde hujumchilar bilen birlikte qéchip yürüwatqan we anilar we balilar heqqide héchqandaq melumat bérilmidi.

18 - Séntebir küni yüz bergen bay kömürkan hujumi weqe yüz bérip bir heptin kéyin radi'omiz teripidin élan qilin'ghan we shuningdin kéyin xelq'ara axbarat wasitiliri weqening tereqqiyatini közitip kéliwatqan idi.

Xitay dölet axbarat organliridin “Tengritagh tori” bügün tunji qétim 18 - séntebir küni bay kömürkanda weqe yüz bergenlikini resmiy ashkarilidi. Emma xewerde kömürkan hujumida xitay tereptin ölgenler sani 16, yarilan'ghanlar sani 18 dep bérildi.

Emma ilgiri radi'omiz ziyaritini qobul qilghan yerlik nöwetchi xadimlar xitay tereptin ölgenler sanining az dégende 50 etrapida ikenlikini bayan qilghan idi.

Xitay bügünki xewiride13 - noyabir küni öltürülgen hujumchilar sanining 28 ikenlikini ashkarilidi.

Eyni chaghda radi'omiz ziyaritini qobul qilghan kan yéza charwichiliq meydanining bashliqimu weqege öz tewelikidin chétilghan gumandarlar sanining 17 neper ikenlikini, weqege chétishliq omumi gumandarlar sanining buningdin köp bolush éhtimalliqini ilgiri sürgen idi.

Xitayning bügünki xewiride hujumchilardin bir nepirining teslim bolghanliqi, 28 nepirining öltürülgenliki bayan qilin'ghan, emma hujumchilar bilen birlikte qéchip yürüwatqan ana we balilarning aqiwiti heqqide héchqandaq melumat bérlmigen. Mezkur charwa meydan bashliqi gumandarlar tizimlikide öz tewelikidin 4 ana we 3 baliningmu barliqini ashkarilighan.

Ijtima'iy taratqularda tarqalghan bir xitay eskerning qolyazmisida bayan qilinishiche, xitay eskerliri gumandarlar mökün'gen jayni bayqashta etraptin anglinip qalghan ayal we balilarning awazigha asaslan'ghan.

Xitay bügünki xewiride kömürkan hujumining “Chet'eldiki bir esebiy teshkilatning qomandanliqida yüz bergenliki” ni, “Hujumchilarning hujumdin awwal chet'eldiki bu teshkilat bilen 6 qétim alaqileshkenliki” ni we “Hujumdin kéyin 3 qétim alaqiliship urush taktikisi heqqide melumat sorighanliqi” ni yazghan. Emma chet'eldiki herqandaq bir teshkilat hazirgha qeder bu weqening jawabkarliqini üstige almidi.

14 - Noyabir küni xitay j x ministirliqi qisqa bir uchur arqiliq, parizhda térrorluq hujumi yüz bergen küni Uyghur rayonida “Bir guruh térrorchilarning öltürülgen” likini daghdughiliq xewer qilghan, emma xewer qisqa waqittin kéyin öchürüwétilgen.

Mezkur xewerde éniq halda bay kömürkan hujumini tilgha almighan bolsimu, atalmish térrorchilargha iz qoghlap zerbe bérish meshghulatining 56 kün dawam qilghanliqini bayan qilish arqiliq, öltürülgen gumandarlarning 18 - séntebir küni yüz bergen bay kömürkan hujumigha chétishliq ikenlikini pash qilip qoyghan idi.

Shuningdin kéyin xelq'ara axbarat wasitilirining bay kömürkan hujumigha qarita diqqiti téximu kücheygen, hetta xitayning heptilik axbarat élan qilish yighinida mexsus bu heqte so'allar soralghan, emma xitay bayanatchi bu weqedin pütünley xewersizlikini tilgha élip weqeni yenila yoshurghan idi.