Дилшат ришит бай наһийсидики вәқәгә қарита баянат елан қилди

Биз игилигән учурларда уйғур дияриниң ақсу вилайити бай наһийисиниң яққа ериқ йезиси базирида хитай сақчилириға һуҗум қилиш вәқәси йүз бәргән.

Биз бу вәқәни дәлилләш үчүн, бай наһийисидики йәрлик хәлқтин әһвал игиләшкә тириштуқ. Хитай даирилири хәвәрни контрол қилған болғачқа, йәрлик аһалиләр соаллиримизға еһтият билән җаваб бәрди.

Ақсу шәһәрлик җамаәт хәвпсизлики идариси бу вәқәгә четишлиқ дәп қариған 31 яшлиқ аблиз абла, 35яшлиқ азадәм нури, 28 яшлиқ илһам абла, 42яшлиқ турамәт убуләһәт, 25яшлиқ муһәммәтҗан абабәкри қатарлиқ бәш уйғур яшни җинайәт гумандарлири дәп тутуш буйруқи елан қилған.

Һәмдә уларни тутуп бәргучиләргә 300 миң хитай пули, учур билән тәминлигүчиләргә 50 миңдин 200 миңғичә хитай пули беридиғанлиқи тоғрилиқ учур тарқатқан.

Биз бу һәқтә көз қаришини елиш үчүн, дуня уйғур қурултийиниң шивитсийәдә турушлуқ баянатчиси дилшат ришитни зиярәт қилдуқ.

Дилшат ришит бугүн мунасивәтлик орунларға бәргән баянатида, хитай даирилириниң бу йил киргәндин башлап, бу йилини “қақшатқуч зәрбәбериш йили” қилип бикитип, уйғур дияриниң һәр қайси шәһәр, наһийилиридә уйғурларни тутқун қилишни давамлаштуруватқанлиқини билдүрди. Райондики хитай сақчилириниң чаған мәзгилидики бихәтәрлик баһанисдә, уйғурларға һәддин артуқ куч қолланғанлиқини, бу сәвәбтин уйғурларниң чидиғусиз зүлумға қарши шиддәтлик қаршилиқлири мәйданға келиватқанлиқини оттуриға қойған дилшат решит хитай даирилирини уйғурларға қаратқан сияситини өзгәртишкә чақирди һәмдә һазирға қәдәр келип чиқиватқан вәқәләрниң җавабкарлиқини хитай даирилири үстигә елиши керәк дәп көрсәтти.