Бүгүрдики зәнҗирсиман партлаштин кейин даириләр өйму-өй нопус ениқлашқа башлиған

Мухбиримиз қутлан
2014-09-24
Share
bugur-partlash-weqesi-weibo.jpg Бүгүр наһийисидә йүз бәргән партлаштин көрүнүш. 2014-Йили 21-сентәбир.
Social Media

Игилишимизчә, 21-сентәбир бүгүрниң бирқанчә җайида зәнҗирсиман партлаш йүз бәргәндин кейин, даириләр наһийә тәвәсидә бирқанчә күнгичә қатнашни үзүп ташлиған.

Нөвәттә йәрлик даириләр сақчиханиларниң маслишиши билән бүгүр наһийәсиниң һәрқайси йеза-базарлирида, болупму партлаш йүз бәргән йеңисар базири билән терәкбазар йезисида өйму-өй бесип нопус ениқлаватқанлиқи мәлум.

Зияритимизни қобул қилған бүгүр наһийә йеңисар базар бартоғрақ кәнтиниң секретари абликим мәзкур кәнтниң йеқинқи үч күндин буянқи әһвалидин учур бәрди.

Униң билдүрүшичә, йеңисар базири билән терәкбазар йезисида зәнҗирсиман партлаш йүз бәргәндин кейин наһийә тәвәсидә омумйүзлүк аммиви қатнашлар тохтитилип, кишиләрниң өйлиридин чиқмай олтуруши уқтурулған.

23-Сентәбирдин башлап мәзкур йезидики кишиләр тала-түзгә чиқип күндилик сода-сетиқ вә һойла-арамлириниң ишлирини қилишқа башлиған, әмма йеза тәвәсидин башқа җайларға беришиға йәнила йол қоюлмиған.

Мәзкур йезидики мәктәпләрдиму уда 3 күнгичә дәрс тохтитилип тақалған. Бартоғрақ кәнтиниң секретари зияритимиз җәрянида бүгүнму балиларниң мәктәпкә бармиғанлиқини билдүрди.

Кәнт секретари абликимниң билдүрүшичә, бүгүрдики зәнҗирсиман партлаштин кейин кәнттин юқири дәриҗилик кадирларға җиддий йиғин ечилған. Һәрқандақ адәмниң вәқәдә өлгән яки яриланған кишиләрниң санини сүрүштүрүшкә болмайдиғанлиқи, мәсул кадирларниң өз орнида кечә-күндүз нөвәтчиликтә туруши лазимлиқи уқтурулған.

Юқиридин чүшкән буйруқ бойичә, һәрқайси кәнтләрниң мәсул кадирлири сақчиларниң маслишиши билән өйму-өй йүрүп нопус ениқлашқа башлиған. Улар бүгүрдики партлаш вәқәсидин илгири түрлүк сәвәбләр билән юртидин айрилип башқа җайларға сәпәр қилған кишиләрниң тизимини турғузған. Һәр бир аилидин сиртқа сәпәргә чиқип кәткән аилә әзалири вә уруқ-туғқанлириниң һазир қәйәрдә, немә иш билән шуғуллиниватқанлиқи шуниңдәк алақилишиш адреси һәққидә учур беришни тәләп қилған. Йәнә бир тәрәптин, йеқинқи бирқанчә айдин буян сирттин кәлгән адәмләрниң әһвали, уларниң кимләр билән алақилишип, кимләрниң өйидә турғанлиқи һәққидики тәпсилий учурлар сүрүштә қилинған.

Кәнт секретари абликим йәнә, партлаш вәқәсини садир қилғучи гумандарлар ичидә сирттин кәлгәнләрниңму һәм бүгүрниң өзидики йәрлик кишиләрниңму барлиқини илгири сүрди. Һалбуки, у гумандарларниң кимлики вә һазирқи әһвали һәққидә соралған соаллиримизға "хәвирим йоқ" дегән сөз билән җаваб беришни рәт қилди.

У йәнә бу қетимлиқ партлитиш нишаниниң йезилиқ һөкүмәт, сақчихана қатарлиқ һөкүмәт органлириға қаритилғанлиқини тилға алди.

Униң билдүрүшичә, бир қисим йәрлик деһқанлар йәкшәнбә күни болғачқа йеза базириға содилиқ қилғили берип партлаш вәқәсигә тоғра келип қалған, бәзилири еғир яриланған. У бартоғрақ кәнтидин бу қетимлиқ партлашта еғир яриланған икки кишиниң йеңила оператсийәдин чиққанлиқини, техичә һошиға кәлмигәнликини баян қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт