D u q hey'iti awstraliyening mélborn we adélayd sheherliride muhim pa'aliyetlerge qatnashti

Awstraliye la trob uniwérsitétida (La Trobe University) ötküzülgen doklat bérish yighinida mutexessisler Uyghurlarning hazirqi weziyitining tosattin otturigha chiqqan bir weziyet emeslikini, xitayning pilanliq halda élip bériwatqan siyasiti ikenlikini otturigha qoyghan.

Dunya Uyghur qurultiyi re'isi dolqun eysa bashchiliqidiki hey'et awstraliyede élip bériwatqan ziyaritining tötinchi küni, awstraliyening mélborn we adélayd sheherliride muhim pa'aliyetlerge qatnashti.

12-Ayning 8-küni mélborn shehiridiki awstraliye la trob uniwérsitétida ötküzülgen doklat bérish yighinida amérika Uyghur kishilik hoquq qurulushi teshkilatining re'isi adwokat nuri türkel ependi bilen amérika Uyghur kishilik hoquq qurulushining xadimi luyisa xanim we la trob uniwérsitéti oqutquchisi proféssor jeymis léybold qatarliq mutexessisler doklat bérip, Uyghurlarning hazirqi weziyitining tosattin otturigha chiqqan bir weziyet emeslikini, xitayning pilanliq halda élip bériwatqan siyasiti ikenlikini otturigha qoyghan. 

Mezkur yighinni awstraliye la trob uniwérsitéti bilen mélborndiki xelq'ara munasiwetler jem'iyiti birlikte uyushturghan bolup, pa'aliyetke herqaysi uniwérsitétlarning oqutquchiliri, xitay tetqiqati bilen shughulliniwatqan mutexessisler we adélayd, mélborn sheherliridin Uyghurlar ishtirak qilghan. 

Amérika Uyghur kishilik hoquq qurulushi teshkilatining re'isi, adwokat nuri türkel ependi téléfon ziyaritimizni qobul qilip, bu heqte melumat berdi. 

Nuri türkel ependi bu xil doklat bérish yighinlirining awstraliye hökümitining Uyghur mesilisi toghrisida siyaset belgilishige türtke bolidighanliqini ilgiri sürdi. 

D u q hey'iti 8-chisla adélaydta awstraliye parlaméntida Uyghur mesilisini tunji qétim otturigha qoyghan parlamént ezasi tony zappi'a ependi bilen körüshüp, Uyghurlarning bügünki weziyiti toghrisida sözleshken. D u q re'isi dolqun eysa ependi bu heqte melumat berdi. 

Adélayd Uyghurlar eng köp olturaqlashqan sheher bolup, d u q hey'iti bu yerde Uyghurlar bilen uchrishish pa'aliyitige qatnashqan. Awstraliye sherqiy türkistan jem'iyiti uyushturghan pa'aliyetke teshkilat re'isi nurmuhemmed mijit ependi, péshqedem siyasiyon exmet igemberdi, péshqedem ziyaliy süyün'gül janishéf xanim we Uyghur jama'iti qatnashqan. D u q ijra'iye hey'iti re'isi ömer qanat ependi bu heqte melumat berdi.

Awstralyede pa'aliyet élip bériwatqan sherqiy türkistan jem'iyiti burundin tartip dunya Uyghur qurultiyini qollap kéliwatqan teshkilatlardin biri hésablinidu. Mezkur teshkilatning re'isi nurmemet mijit ependi d u q hey'itini kütüwélish pa'aliyiti ötküzgenlikini, uchrishishta yurtdashlargha d u q ning pa'aliyetliri heqqide melumat bérilgenlikini bayan qildi. 

D u q ning awstraliye ziyariti 12-ayning 9-künigiche dawamlishidiken.