D u q re'isining en'gliyediki 3 künlük ziyariti netijilik axirlashti

Ixtiyariy muxbirimiz ekrem
2019.01.23
Share on WhatsApp
Share on WhatsApp
dolqun-eysa-engliye.jpg D u q re'isi dolqun eysa ependining en'gliyediki uchrishishliridin bir körünüsh. 2019-Yili 20-yanwar.
RFA/Ekrem

Dunya Uyghur qurultiyining re'isi dolqun eysa en'gliyediki köpligen musulmanlar teshkilatliri bilen uchrishish ötküzüp, jaza lagérlirigha qarshi ortaq heriket qilishqa kélishken.

Xitay hakimiyitining Uyghur diyarida tesis qilghan “Qayta terbiyelesh merkizi” namidiki jaza lagérlirigha qarshi en'gliye hökümitini heriketke keltürüsh hemde islam dunyasini oyghitish meqsitide 20-yanwar en'gliye paytexti london'gha yétip kelgen d u q re'isi dolqun eysa ependi bu üch kün ichide en'gliye parlamént ezaliri bilen söhbetler élip barghandin sirt, xelq'arada tesiri küchlük bolghan merkizi londondiki bir qisim musulman teshkilatliri bilen uchrishishlar ötküzüp, bundin kéyin ortaq élip baridighan pa'aliyetliri toghrisida öz-ara kélishimlerde bolghan.

Londondin ziyaritimizni qobul qilghan d u q re'isi dolqun eysa ependi bu qétimqi en'gliye ziyaritining meqsiti we islamiy teshkilatlar bilen hemkarlishishning zörüriyetliri toghrisida toxtilip, 2019-yili islam dunyasini xitayning jaza lagérlirigha qarshi omumyüzlük qozghash arqiliq xelq'arada Uyghurlar mesilisi boyiche yenimu zor jama'et pikri hazirlashning d u q ning xizmet küntertipidiki muhim bir nuqta ikenlikini tilgha aldi.

En'gliyediki Uyghur siyasiy aktipliridin rehime xanimning bildürüshiche, 22-yanwar küni ular merkizi londondiki islam dunyasida tesiri zor bolghan bir qisim musulmanlar teshkilatlirining rehberliri bilen söhbetler élip bérip, ularning qizghin hésdashliqi we qollishini qolgha keltürgen. “Musulmanlargha yardem” teshkilati Uyghurlarni qollaydighanliqini, birlikte hemkarliship heriket qilishni xalaydighanliqini bildürgen.

D u q re'isi dolqun eysa ependiler tünügün yene londondiki “Biritaniye musulmanlar mejlisi” teshkilatinimu ziyaret qilghan. Dunyaning herqaysi jaylirida 500 din artuq tarmaq organliri bolghan bu teshkilatmu d u q we Uyghurlargha yardem qolini sunidighanliqini bildürgen.

22-Yanwar kechte “Rohin'galargha adalet” teshkilatining yighini bolup ötken. D u q re'isi dolqun eysa ependi bu yighinda nutuq sözlep, Uyghur diyarining nöwettiki weziyiti we jaza lagérliri mesilisi boyiche doklat teqdim qilghan. Rehime xanim “Rohin'galargha adalet” teshkilatining her yerlerde achqan yighinlirida Uyghurlar mesilisinimu tilgha élip kéliwatqanliqini, Uyghurlar weziyitini eks ettüridighan resimlik pilakatlarni özliri layihelep yasap chiqqanliqini hemde sehnilerge tiziwatqanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.