Д у қ иҗраийә комитетиниң йиғини башланди

Д у қ ниң өткән йили чақирилған 6-нөвәтлик пәвқуладдә қурултийидин кейинки тунҗи нөвәтлик иҗраийә комитети кеңәйтилгән йиғини белгийәниң антиверфен шәһиридә 22-апрел чүштин кейин башланди.

Мәлум болушичә, йилда икки қетим иҗраийә комитети йиғини чақириш иши д у қ ниң низамнамисидә бәлгиләнгән болуп, бу йиғинларда алдинқи йерим йиллиқ хизмәтләр хуласә қилиниш билән биргә кәлгүси 6 айлиқ хизмәтләрниң пилан-программилири музакирә қилинидикән һәмдә муһим қарарлар елинидикән.

Нәқ мәйдандин игилигән мәлуматлиримизға көрә, антиверфен шәһиридә башланған бу йиғинға америка, канада, японийә, австралийә, түркийә, қазақистан, қирғизистан, әнглийә, шиветсийә, шветсарийә, норвегийә, голландийә, германийә қатарлиқ 10 дин артуқ дөләттин кәлгән д у қ рәһбәрлири һәмдә д у қ тәркибидики һәрқайси әлләрдин кәлгән йәрлик тәшкилатларниң мәсуллири қатнашқан. Йиғинниң ечилиш мурасимиға қурултай иҗраийә комитетиниң рәиси өмәр қанат әпәнди риясәтчилик қилған. 

Д у қ ниң рәиси долқун әйса әпәнди тунҗи болуп сөзгә тәклип қилинғанда бу қетимқи йиғинға иштирак қилған вәкилләрни қарши алидиғанлиқини тәкитләш билән биргә 6-нөвәтлик қурултайдин буянқи 5 айлиқ хизмәтләр һәққидә доклат бәргән. У доклатида д у қ ниң қисқиғина 5 ай ичидә явропа дөләтлири, шималий америка, түркийә, японийә қатарлиқ әлләрдә елип барған муһим хизмәтлирини әскәртип өткән. 

Йиғинда қурултай иҗраийә комитетиниң рәиси өмәр қанат әпәнди, д у қ ниң 6-нөвәтлик вәкилләр қурултийи ахирлашқан 2017-йили 11-айниң 12-күнидин бүгүнки иҗраийә комитетиниң йиғини башланған 2018-йили 4-айниң 22-күнигичә болған җәряндики 5 айлиқ хизмәтләрниң хуласә доклатини йиғин әһлиниң диққитигә сунған. 

Доклатта орун алған мәзмунлар 7 чоң тема астида баян қилинған болуп, д у қ ниң бу 5 ай ичидә муһаҗирлар мәсилиси саһәсидә явропа дөләтлири вә явропа иттипақида, б д т вә хәлқара йиғинларда, америка вә канадада, түркийәдә вә японийәдә уйғурлар мәсилисини аңлитиш бойичә елип барған муһим паалийәтлири һәмдә хизмәтлириниң сани йүз қетимдин һалқип кәткән. 

Қурултайниң муавин рәиси пәрһат муһәммиди әпәнди бу йиғин һәққидә тохталғанда, уйғур елида хитайниң зулуми әвҗигә чиққан бир мәзгилдә иҗраийә комитетиниң йиғинини чақиришниң сәвәби һәм әһмийәтлирини тилға алди.

Д у қ иҗраийә комитетиниң кеңәйтилгән йиғини 2 күн давам қилидиған болуп, әтидин башлап қурултай тәркибидики һәрқайси комитетларниң кәлгүси 6 айлиқ хизмәт пиланлири көздин көчүрүлүп қурултай идарә һәйитиниң тәстиқиға сунулидикән.