Putbol cholpani irpan hézimjanning chöchekte “Terbiyelesh lagéri” da ikenliki ashkarilandi

Birqanche heptidin béri xitayche ijtima'iy axbarat wastilirida xitay döletlik putbol komandisining ezasi, jyangsu “Suning putbol komandisi” ning hujumchisi, bu yil emdila 19 yashqa kirgen putbol cholpini irpan hézimjanning ushtumtut ghayib bolup ketkenliki heqqide xewerler tarqaldi. Irpanning komandida bolmasliqigha qarita naraziliq we endishilirini bayan qilghan top mestaniliridin biri uning Uyghur diyaridiki “Terbiyilesh lagéri” da bolush éhtimalliqini ilgiri sürgen. Muxbirimizning bu yip uchigha asasen chöchekke qarita élip barghan téléfon ziyaretliri dawamida uning ikki aydin béri “Terbiyilesh lagéri” da ikenliki delillendi.

“Suning putbol kulubi” ning irpan heqqide gep qilalmasliqi top mestaniliri arisida uning nöwettiki ehwali heqqide endishe peyda qilghan. Irpanning shexsiy blogini közetken tor mestaniliri uning birqanche heptidin buyan peqetla torgha chiqmighanliqini bayqighan. Uyghur diyarining weziyitidin xewerdar kishilerdin biri uning Uyghur rayonida keng kölemde dawam qiliwatqan “Siyasiy terbiye lagéri” da bolush éhtimalliqini otturigha qoyghan.

Biz bu uchurlargha asasen irpan hézimjanning yurti bolghan chöchek wilayitige téléfon qilduq. Wilayettiki bezi xadimlar irpan hézimjanning ehwaldin xewersizlikini éytti. Emma téléfonimizni qobul qilghan xadimlarning héch biri irpan hézimjanning tutulghanliqini inkar qilmidi. Xadimlardin biri ehwalni dörbiljin nahiyilik saqchi idarisidin sürüshte qilishimizni tewsiye qildi. Dörbiljin nahiyilik saqchi idarisi irpan hézimjanning dörbiljin bazarliq saqchixana teripidin tutulghanliqini bayan qildi. Biz bu xadim teminligen alaqe uchurigha asasen irpan hézimjanni tutqanliqi we “Terbiyilesh lagéri” gha tapshurup bergenliki ilgiri sürülgen bir saqchi xadimi bilen alaqileshtuq. Bu xadim irpan hézimjanni özining tutqanliqini inkar qilmidi. Emma u irpan hézimjanning ehwali, jümlidin uning qaysi “Terbiyilesh lagéri” da ikenliki heqqide özining jawab bérelmeydighanliqini éytti we saqchi qomandanliq merkizi bilen alaqilishishimizni tewsiye qildi. Dörbiljin nahiyilik saqchi qomandanliq merkizining bir xadimi irpan hézimjanning 2 aydin béri “Terbiyilesh lagéri” da ikenlikini ashkarilidi.