“1 - авғуст полат - төмүр завути” да газ чиқип кетип 2 уйғур ишчи өлгән

Иҗтимаий таратқуларда өткән йилиниң ахирида үрүмчи әтрапидики “1 - авғуст полат - төмүр завути” да газ чиқип кетип, бирқанчә уйғур ишчиниң өлгәнлик хәвири тарқалған иди.

Өз вақтида хитай һөкүмәт таратқулири бу һәқтә һечқандақ хәвәр бәрмигәчкә, мәзкур вәқәниң тәпсилати һәққидә учур елиш мумкин болмиған иди.

Аридин 4 айға йеқин вақит өткәндә, мәзкур вәқәниң тәпсилати ашкара болди. Бүгүн ашу вәқәдә һаятидин айрилған уйғур ишчи абдусалам мәмтиминниң аилә - тавабиатлири радийомиз зияритини қобул қилип, бу җәряндики тәпсилатлардин мәлумат бәрди.

Мәлум болушичә, өткән йили 10 - айниң 24 - күни үрүмчи әтрапидики 1 - авғуст полат - төмүр завутида газ чиқип кетип 2 уйғур ишчи өлгән.

Өлгән икки ишчиниң бири мәрһум абдусалам мәмтимин болуп, улар һечқандақ бихәтәрлик әслиһәлири орунлаштурулмиған орунда айларчә ишләшкә мәҗбур болған.

Уйғур ишчиларни әрзан әмгәк күчи сүпитидә яллап ишләткүчиләр хебей өлкисидин чиқип, 1 - авғуст полат - төмүр завутида иш көтүрә алған хитайлар икән. Улар айлиқиға икки миң йвән пул берип шу җайдики уйғур ишчилирини яллап ишләткән. Хәтири зор болған иш орниға һечқандақ бихәтәрлик әслиһәлири орнатмиған.

Вәқә йүз бәргәндин кейин өлгүчиләрниң аилә - тавабиатлири шунчә издәпму хитай хоҗайинларни тапалмиған. Сүрүштүрүш җәрянида уларниң һәтта ишханисиму йоқ иш көтүрә алғучилар икәнликини, уйғурларниң ишсизлиқидин пайдиллинип, уларни төвән иш һәққи билән ишлитип кәлгәнликини байқиған.

Өлгүчиләрниң аилә - тавабиатлири айларчә дәва қилипму төләм алалмиғачқа, мәрһум абдусалам мәмтиминниң мийити 34 күн дәпнә қилинмай тоңлатқуда туруп қалған.

Ахирида 1 - авғуст полат - төмүр завутиниң мәсуллири билән шу йәрдики сақчи даирилири чоң вәқә чиқип кетишиниң алдини елиш үчүн хитай хоҗайинларға бесим ишләткән. Нәтиҗидә хитай хоҗайинлар мәрһум абдусалам мәмтиминниң аилисигә аран 580 миң йвән төләм берип ишни болди қилған. Һаятидин айрилған йәнә бир уйғур ишчиниң аилисигә төләм берилгән яки берилмигәнлики мәлум әмәс.

Тәпсилатини аваз улиништин аңлиғайсиз.