“1 - Awghust polat - tömür zawuti” da gaz chiqip kétip 2 Uyghur ishchi ölgen

Muxbirimiz qutlan
2015.02.24
polat-tomur-ishchisi-305.jpg Xewp-xeterge qarimay japaliq ishlewatqan polat-tömür tawlash ishchiliri. 2008-Yili 10-iyul.
AFP


Ijtima'iy taratqularda ötken yilining axirida ürümchi etrapidiki “1 - Awghust polat - tömür zawuti” da gaz chiqip kétip, birqanche Uyghur ishchining ölgenlik xewiri tarqalghan idi.

Öz waqtida xitay hökümet taratquliri bu heqte héchqandaq xewer bermigechke, mezkur weqening tepsilati heqqide uchur élish mumkin bolmighan idi.

Aridin 4 aygha yéqin waqit ötkende, mezkur weqening tepsilati ashkara boldi. Bügün ashu weqede hayatidin ayrilghan Uyghur ishchi abdusalam memtiminning a'ile - tawabi'atliri radiyomiz ziyaritini qobul qilip, bu jeryandiki tepsilatlardin melumat berdi.

Melum bolushiche, ötken yili 10 - ayning 24 - küni ürümchi etrapidiki 1 - awghust polat - tömür zawutida gaz chiqip kétip 2 Uyghur ishchi ölgen.

Ölgen ikki ishchining biri merhum abdusalam memtimin bolup, ular héchqandaq bixeterlik esliheliri orunlashturulmighan orunda aylarche ishleshke mejbur bolghan.

Uyghur ishchilarni erzan emgek küchi süpitide yallap ishletküchiler xébéy ölkisidin chiqip, 1 - awghust polat - tömür zawutida ish kötüre alghan xitaylar iken. Ular ayliqigha ikki ming ywen pul bérip shu jaydiki Uyghur ishchilirini yallap ishletken. Xetiri zor bolghan ish ornigha héchqandaq bixeterlik esliheliri ornatmighan.

Weqe yüz bergendin kéyin ölgüchilerning a'ile - tawabi'atliri shunche izdepmu xitay xojayinlarni tapalmighan. Sürüshtürüsh jeryanida ularning hetta ishxanisimu yoq ish kötüre alghuchilar ikenlikini, Uyghurlarning ishsizliqidin paydillinip, ularni töwen ish heqqi bilen ishlitip kelgenlikini bayqighan.

Ölgüchilerning a'ile - tawabi'atliri aylarche dewa qilipmu tölem alalmighachqa, merhum abdusalam memtiminning miyiti 34 kün depne qilinmay tonglatquda turup qalghan.

Axirida 1 - awghust polat - tömür zawutining mes'ulliri bilen shu yerdiki saqchi da'iriliri chong weqe chiqip kétishining aldini élish üchün xitay xojayinlargha bésim ishletken. Netijide xitay xojayinlar merhum abdusalam memtiminning a'ilisige aran 580 ming ywen tölem bérip ishni boldi qilghan. Hayatidin ayrilghan yene bir Uyghur ishchining a'ilisige tölem bérilgen yaki bérilmigenliki melum emes.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.