5-Июлдин кейин из-дерәксиз ғайиб болғанлар (33)

Мухбиримиз шөһрәт һошур
2013.07.29
5-iyul-weqeside-ghayib-bolghanlar-305.png 5-Июл вәқәсидин кийин ғайиб болған кишиләр (сол тәрәп юқиридин саәт истириликисиниң йөнилиши бойичә): мәмәтабла абдуреһим, закир мәмәт, мухтәр мәхәт, турсунҗан тохти
Photo: RFA

Мәлум болушичә, 5-июлдин кейин из-дерәксиз ғайиб болғанлардин бири ярдәмчи сақчи болуп, у вәқә йүз бәргән күни форма кийими билән болмиғачқа, намайишчилар қатарида тутуп кетилип ғайиб болған.

Ақсу аватниң айвағ сақчиханисида 2 йилдин бери сақчи болуп ишләватқан вә рәсмий сақчилиққа имтиһан беришкә тәйярлинип туруватқан 24 яшлиқ шөһрәт осман, дадисини давалитиш үчүн ишидин рухсәт сорап 6-айниң 24-күни үрүмчигә кәлгән. У 5-июл күни 2-дохтурханида давалиниватқан дадисиға сирттин тамақ әкиливатқанда намайишчиларни тутқун қиливатқан сақчиларниң удулиға келип қалған. Сақчилар шөһрәт османниң өзини тонуштуруши вә дадисиниң әһвалини чүшәндүрүшлиригиму пәрва қилмастин уни тутуп кәткән. Шу күндин етибарән ярдәмчи сақчи шөһрәт османниң учурини униң 30 йиллиқ сотчи аниси меһриниса ханим һечнәдин алалмиған.

Мухбир: сиз меһриниса ханимму?
Меһриниса: һә, мән шу.

Мухбир: биз, сизниң бир оғлиңизниң ғайиб болуп кәткәнлики хәвирини уқтуқ, бу тоғриму?
Меһриниса: шундақ, тоғра.

Мухбир: оғлиңизниң исми немити?
Меһриниса: шөһрәт осман, шу йили 24 яш. Оттура техникомни пүттүргән, ярдәмчи сақчи болуп ишләватқан, рәсмий сақчилиққа имтиһанға тәйярлинивататти.

Мухбир: демәк, оғлиңиз ярдәмчи сақчимиди?
Меһриниса: шундақ. Айвағ вә долан сақчиханилирида икки йил ярдәмчи сақчи болуп ишлигән.

Мухбир: үрүмчидә немә иш қиливатқанти?
Меһриниса: дадисини давалатқили әкәлгәнтуқ. 6-Айниң 24-күни кәлдуқ, 10 күндин кейин бу вәқәгә йолуқтуқ.

Мухбир: вәқә йүз бәргән күни оғлиңиз нәдә иди?
Меһриниса: сиңлим, йәңгәм билән биллә дадисиға тамақ әкеливатқан, иккинчи дохтурханиниң алдида бир ишлар болуп кетип сақчилар оғлумниму тутуп меңипту. Сиңлим берип сақчилар билән соқушупту, бу бала гунаһсиз, дадисиға қараватиду, қоюветиңлар дәп, бир уйғур сақчи ишни бузмаң, гунаһсиз болса қоюветилиду дәп әкитипту. Шу әкәткән пети йоқ.

Мухбир: шу вақитниң өзидә үстидә форма кийими йоқмиди?
Меһриниса: йоқти. Дадисиға қараватқан болғандикин.

Мухбир: әгәр форма кийими билән болған болсиму, бу хапилиқлардин сақлинип қелиниш еһтимали болатти мәнчә.
Меһриниса: мән болған болсамму, фаюәнниң (сотниң) кинишкисини көрситип бир нәрсә дәп бақаттим.

Мухбир: сиз сотта ишләмсиз?
Меһриниса: шундақ сотта ишләймән.

Мухбир: қайси бөлүмдә?
Меһриниса: мәмури сот бөлүмидә.

Мухбир: қанчә йил болди сотта ишләватқини?
Меһриниса: 30 йил болди, әмди пенсийигә чиққиливатимән. Пенсийигә чиқип оғлумни издәшни башлаймән. Һазир бир тәрәптин хизмәт, бир тәрәптин йолдушумниң иши, йәнә бир тәрәптин оғлумниң иши...

Мухбир: демәк оғлиңизниң қайси қамақханиға әкитилгинидин хәвәр тапалмидиңизму?
Меһриниса: яқ, һечқандақ хәвәр алалмидим.

Юқирида 5-июлдин кейин из-дерәксиз ғайиб болғанлар намлиқ чатма хәвәрниң 33-қисмини аңлидиңлар.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.