Токйода 5-феврал или вәқәсини хатириләш илмий муһакимә йиғини чақирилиду

Ихтиярий мухбиримиз һаҗи қутлуқ қадири
2016-01-28
Share
yaponiye-ghulja-weqesi-305.jpg Японийә уйғур бирлики тәшкилатиниң «5-феврал или вәқәсини хатириләш илмий муһакимә йиғини» һәққидики әлани. 2016-Йили январ.
RFA/Qutluq

Игилишимизчә, 7-феврал күни токйода японийә уйғур бирлики тәшкилатиниң тәшкиллиши билән 5-феврал или вәқәсиниң 19 йиллиқини хатириләш йүзисидин илмий муһакимә йиғини чақирилидикән. Илмий муһакимә йиғиниға токйо әтрапидики бир қисим университетларниң профессорлири, хитай ишлири мутәхәссислири, сиясәтчиләр вә шундақла бир қисим парламент әзалири тәклип қилинған.

5-Феврал или вәқәсиниң 19 йиллиқини хатириләш илмий муһакимә йиғини шу күни кәч саәт алтә йеримдин башлап токйо шинҗукудики көп мәдәнийәтләр мәркизидә өткүзүлидикән. 7-Феврал әтигәндә йәнә токйодики хитай әлчиханисиниң алдида японийә уйғур бирлики тәшкилатиниң тәшкиллиши билән хитайға қарши намайиш елип берилидикән.

Бу қетим токйода чақирилидиған 5-феврал или вәқәсиниң 19 йиллиқини хатириләш паалийитигә алдин алаһидә тәйярлиқ қилиш үчүн японийә уйғур бирлики тәшкилати токйода паалийәт елип бериватқан бир қисим кишилик һоқуқ тәшкилатлири бирликтә һәмкарлишип «5-феврал или вәқәсини хатириләш паалийити тәйярлиқ комитети» қурған.

Зияритимизни қобул қилған мәзкур тәйярлиқ комитетиниң мудири сато әпәнди тәйярлиқ хизмәтлири һәққидә қисқичә тохтилип: «5-феврал ғулҗа вәқәси 1997-йили йүз бәргәндә японийәдә мәтбуатлардин ‹асаһи шинбун' гезити алди билән бу һәқтә қисқичә учур бәрди. Шундин буян ғулҗа вәқәсигә даир түрлүк хәвәр вә анализ мақалилири японийә мәтбуатлирида берилип турди. Мәзкур вәқә 2008-йили японийә уйғур тәшкилати қурулғандин башлап рәсмий рәвиштә түрлүк паалийәтләр елип берилип, дәсләпки қәдәмдә японийә җәмийитигә аңлитилди. Бу қетим йеңидин қурулған японийә уйғур бирлики тәшкилати бу һәқтә даириси вә мәзмуни бир қәдәр кәң болған паалийәт елип беришни пиланлап, һазир бу ишқа җиддий тәйярлиқ қиливатимиз. Мән паалийитимизгә көплигән уйғур вә японларниң қатнишишини үмид қилимән» деди.

Зияритимизни қобул қилған японийә уйғур бирлики тәшкилатиниң муавин рәиси, 5-феврал или вәқәсини хатириләш тәйярлиқ комитетиниң муавин мудири ғалип миҗит бу қетимқи паалийәт һәққидә тохталди. У сөзидә бу қетимқи паалийәтниң әһмийити зорлуқини билдүрди.

Токйода елип берилидиған 5-феврал или вәқәсиниң 19 йиллиқини хатириләш тәйярлиқ паалийитигә актип иштирак қиливатқан японийә уйғур бирлики тәшкилатиниң даимий һәйәт әзаси гүлистан ханим зияритимизни қобул қилип, уйғур елидә елип бериливатқан уйғурларниң түрлүк қаршилиқ һәрикәтлириниң маһийитини японийә хәлқигә тоғра чүшәндүрүштә, бу паалийәтниң бәлгилик рол ойнайдиғанлиқини билдүрди.

Ахирида зияритимизни қобул қилған японийә уйғур бирлики тәшкилатиниң рәиси, 5-феврал или вәқәсини хатириләш тәйярлиқ комитетиниң муавин мудири доктор турмуһәммәт һашим илмий муһакимә йиғини давамида елип берилидиған намайиш һәққидә тохталди.

Японийәдики бир қисим көзәткүчиләрниң ейтишичә, 5-феврал или вәқәсини хатириләш паалийити йеңидин қурулған японийә уйғур бирлики тәшкилатиниң тунҗи қетимлиқ паалийити һесаблинидикән.

Юқириқи аваз улинишидин тәпсилатини аңлаң.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.