Илһам тохтини 2018-йиллиқ "нобел тинчлиқ мукапати" ға намзат көрситиш иши давамлашмақта

Мухбиримиз меһрибан
2018-01-15
Share
ilham-toxti-Nobel-mukapatigha-imza-toplash.jpg Хитай түрмисидики уйғур зиялийси илһам тохтини 2018-йиллиқ "нобел тинчлиқ мукапати" ға намзатлиққа көрситиш үчүн, явропа парламент әзаси илхан күчүк әпәндиниң қойған имзаси. 2018-Йили 10-январ, белгийә пайтәхти бирюссел.
RFA/Ekrem

Германийәдики илһам тохти гурупписиниң рәиси әнвәр җан әпәнди радийомиз зияритини қобул қилип, мәзкур гуруппа хитай түрмисидики уйғур зиялийси илһам тохтини 2018-йиллиқ "нобел тинчлиқ мукапати" ға намзатлиққа көрситиш үчүн имза топлаш паалийити елип бериватқанлиқи, бир қисим сиясий әрбаблар вә зиялийлириниң имзасини тапшуруп алғанлиқни билдүрди.

Әнвәр җан әпәндиниң билдүрүшичә, илһам тохтини 2018-йиллиқ "нобел тинчлиқ мукапати" ға көрситиш үчүн имза топлашта "илһам тохти гурупписи" ниң һавалиси билән дуня уйғур қурултийиниң рәиси долқун әйса әпәнди 10-январ күни явропа парламентидики илхан күчүк әпәнди қатарлиқ 6 нәпәр муһим әрбабниң имзасини алған. Нөвәттә йәнә илгирики йилларда "нобел тинчлиқ мукапати" берилгән тибәтләрниң роһаний даһийси далай лама қатарлиқ әрбаблар, ғәрб дөләтлиридики тәсири күчлүк сиясий тәшкилатлар вә зиялийларниң имзасини топлаш паалийити җиддий давамлашмақтикән.

Мәлум болушичә, 1-айниң 10-күнигә қәдәр явропа парламентиниң муавин рәиси фабио касталдо, парламент әзаси илхан күчүк, һелга трүпел, лазло токәс, игназио коррао қатарлиқлар намзатлиқ җәдвелигә имза қойған.

Әнвәр җан әпәнди радийомизға йоллиған учурида йәнә явропадики тәсири күчлүк сиясий тәшкилатлардин мәркизи әнглийәдики либирал интернатсионалниң илгирики рәиси, нөвәттики пәхри рәиси голландийәлик фан баален әпәндиниң илһам тохтини 2018-йиллиқ "нобел тинчлиқ мукапати" ға намзат қилип көрситиш һәққидә язған чақириқиниму қошуп әвәткән.

Фан баален әпәнди чақириқида немә үчүн илһам тохти әпәндини 2018-йиллиқ "нобел тинчлиқ мукапати" ға намзат қилип көрситишниң муһимлиқи һәққидә тохтилип, "уйғурларниң мәшһур зиялийси илһам тохти 2017-йиллиқ дуня әркинлик мукапатиниң саһиби. Биз нөвәттә уни йәнә 2018-йиллиқ нобел тинчлиқ мукапатиға намзат қилип көрситишни тәшәббус қиливатимиз. Буниң сәвәби илһам тохти әпәнди нөвәттә диний етиқади, мәдәнийити вә сиясий һоқуқи бастурулушқа учраватқан уйғурлар вә хитай хәлқиниң нөвәттики вәзийити һәққидә диалог йоли арқилиқ пидаийлиқ көрсәткән авангарттур," дегән.

Әнвәр җан әпәндиниң билдүрүшичә, илһам тохтини 2018-йиллиқ нобел тинчлиқ мукапатиға намзат қилип көрситишкә имза топлаш һәрикитигә чәтәлләрдики тәсири күчлүк хитай зиялийлириму аваз қошқан болуп, әнвәр җан әпәнди 11-январ күни америкидики хитай демократ зиялийлиридин ша йеляң әпәндиниң имзасини тапшуруп алған.

Әнвәр җан әпәндиниң билдүрүшичә, чәтәлләрдики уйғур паалийәтчилиридин дуня уйғур қурултийиниң илгирики рәиси, әркин алиптекин әпәндиму илһам тохтини 2018-йиллиқ "нобел тинчлиқ мукапати" ға намзат қилип көрситиш хизмитигә йеқиндин һәмкарлашмақтикән. Әркин алиптекин әпәнди "нобел тинчлиқ мукапати" ниң саһиби далай лама қатарлиқ әрбабларға илһам тохтини 2018-йиллиқ "нобел тинчлиқ мукапати" ға намзат қилип көрситиш һәққидә һавалә мәктуплири әвәткән.

"илһам тохтини қутқузуш гурупписи" ниң муавин рәиси маре һолзман ханим радийомиз зияритини қобул қилғинида, илһам тохтини2018-йиллиқ "нобел тинчлик мукапати" ға намзат қилип көрситишкә имза топлаш һәрикити нөвәттә йәнила давамлишиватқанлиқи үчүн, һазирчә бу һәқтә тәпсилий мәлумат беришниң балдурлуқ қилидиғанлиқини билдүрди. У, 1-айниң ахири мәхсус радийомиз зияритини қобул қилип, имза топлаш һәрикити һәққидә техиму тәпсилий мәлуматларни берәләйдиғанлиқини билдүрди.

Илһам тохти әпәндини 2018-йиллиқ "нобел тинчлиқ мукапати" ға намзат қилип көрситиш тәшәббусиға хитай ичидики кишилик һоқуқ паалийәтчилириму актип аваз қошмақта. Хәлқарада тонулған кишилик һоқуқ паалийәтчиси 2008-йиллиқ "сахароф әркинлик мукапати" ниң саһиби ху җя әпәнди әнә шуларниң бири. Ху җя әпәнди илгири радийомиз зияритини қобул қилғинида, уйғурларниң һәққаний һоқуқлири үчүн бәдәл төлигән уйғур зиялийси илһам тохтиниң "нобел тинчлиқ мукапати" ға әң лайиқ намзат икәнликини билдүргән вә илһам тохтиниң бейҗиңдики аилисиниң әһвали һәққидә радийомиз уйғур бөлүмигә үзлүксиз мәлумат берип кәлмәктә.

12-январ күни өзиниң бир мәзгиллик давалаштин кейин дохтурханидин өйигә қайтип кәлгәнликини, һазирчә авазлиқ зиярәтни қобул қилиш имканийити йоқлиғини билдүргән ху җя әпәнди учур йоллап, дохтурханидин чиқипла илһам тохтиниң бейҗиңдики аяли гүзәлнур ханим вә балилири билән көрүшкәнликини, илһам тохтиниң балдуррақ әркинликкә еришиши үчүн униңға йәниму көплигән хәлқаралиқ мукапатларниң берилиши керәкликини, дуняниң бу уйғур зиялийсини унтуп қалмаслиқини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт