Bérlinda ilham toxti we Uyghurlar weziyiti tonushturuldi

Muxbirimiz méhriban
2018-05-22
Élxet
Pikir
Share
Print
Xelq'ara kechürüm teshkilati bérlin shehiride uyushturghan ilham toxti pa'aliyitidin körünüsh. 2018-Yili 22-may, gérmaniye.
Xelq'ara kechürüm teshkilati bérlin shehiride uyushturghan ilham toxti pa'aliyitidin körünüsh. 2018-Yili 22-may, gérmaniye.
RFA

Xelq'ara kechürüm teshkilati 22-may seyshenbe küni kech gérmaniyening bérlin shehiride ilham toxti pa'aliyiti uyushturghan.

Xelq'ara kechürüm teshkilatining pa'aliyet küntertipidin melum bolushiche, mezkur pa'aliyette, ilham toxti heqqidiki höjjetlik filim qoyulghandin bashqa, ilham toxti we uning a'ilisining yéqinqi ehwali, xelq'arada ilham toxtini qutquzush üchün élip bériliwatqan pa'aliyetler we nöwettiki Uyghur weziyiti tonushturulghan.

Xelq'ara kechürüm teshkilatining bérlin-kruzbérg guruppisining teshkillishi bilen 22-may gérmaniye waqti kech sa'et 9 da bérlin shehiride, ilham toxtigha a'it pa'aliyet uyushturuldi.

Mezkur teshkilatning tor békitide élan qilin'ghan pa'aliyet heqqidiki uqturushtin melum bolushiche, mezkur pa'aliyette ilham toxti heqqide ishlen'gen 30 minutluq höjjetlik filim qoyulghandin bashqa yene ilham toxti we nöwettiki Uyghur weziyiti heqqide doklat bérishmu uyushturulghan.

Gérmaniyediki ilham toxtini qollash guruppisidin guruppa bashliqi enwerjan ependi radiyomizgha uchur yollap, eslide bu pa'aliyetni xelq'ara kechürüm teshkilatining bérlin-kruzbérg shöbisi teshkilligen bolsimu, emma gérmaniyediki ilham toxtini qollash guruppisimu mezkur pa'aliyetni yéqindin qollighanliqini bildürdi.

Enwerjan ependining bildürüshiche, ötken yili xeter astidiki milletler teshkilatining ispanye-mallorcha shöbisi we kéyinche gérmaniyediki xeter astidiki milletlerni qoghdash teshkilati alahide höjjetlik filim teyyarlighan. 22-Maydiki pa'aliyette ashu filimlerdin üzündiler élin'ghandin bashqa ijtima'iy taratqularda tarqalghan ilham toxti heqqidiki bezi höjjetlik matériyallar retlinip, xelq'ara kechürüm teshkilati teripidin teyyarlan'ghan ilham toxti heqqidiki 30 minutluq höjjetlik filim körsitilgen. Ilham toxti guruppisi bolsa mezkur pa'aliyette tonushturush üchün ilham toxtining ehwali we Uyghurlar weziyiti heqqide doklat teyyarlighan.

Guruppa bashliqi enwerjan ependi we guruppidiki in'girid widarto xanimlarning bildürüshiche, ular pa'aliyet qatnashquchilirigha ilham toxtining qilghan ish-izlirini tonushturghan we ularning sorighan so'allirigha jawab bergen.

Pa'aliyet bashlinishtin ilgiri ziyaritimizni qobul qilghan enwerjan ependining bildürüshiche, mezkur pa'aliyet bérlin shehiridiki rozépark yeni etirgül baghchisigha orunlashturulghan bolup, bu qétimqi pa'aliyetni teshkilligen xelq'ara kechürüm teshkilatining bérlin-kruzbérg guruppisi xadimi antoniya xanim yene kechlik yighilishning riyasetchilikini üstige alghan.

Antoniya xanim ziyaritimizni qobul qilip, özining xelq'ara kechürüm teshkilatining gérmaniye shöbiside ishleydighanliqi we ikki yil ilgiri mezkur teshkilattiki u we bashqa 22 neper ezaning mexsus ilham toxti we Uyghurlar weziyiti heqqidiki pa'aliyetlirini bashlighanliqini bügün kéche orunlashturghan pa'aliyetningmu, gérmaniye xelqige xitay hökümiti teripidin naheq jazalinip türmige mehkum qilin'ghan ilham toxti we nöwettiki Uyghur weziyitini anglitish ikenlikini bildürdi.

Ilham toxtini qollash guruppisining guruppa bashliqi enwerjan ependi we guruppidiki in'girid widarto xanimlarning bildürüshiche, ular bü'e'ünki pa'aliyette ilham toxtining qilghan ish-izlirini tonushturghandin bashqa nöwettiki Uyghur weziyiti heqqidimu doklat béridu.

Ilham toxti guruppisining bashliqi enwerjan ependining bildürüshiche, u yene pa'aliyet qatnashchilirigha mezkur guruppining ilham toxti üchün élip barghan pa'aliyetliri heqqidmu melumat béridu.

Ilham toxti guruppisining yene bir gholluq ezasi in'grid xanim bolsa ilham toxtining ehwaligha birleshtürüp, Uyghurlarning tarixi we medeniyiti üstide toxtallidighanliqini bildürdi.

Toluq bet