Ilham toxti we Uyghurlarning kishilik hoquqi namliq yighin ötküzüldi

Ixtiyariy muxbirimiz ekrem
2016-12-12
Share
Ilham-toxti-we-uyghurlarning-kishilik-hoquqi-1.jpg Ilham toxti we Uyghurlarning kishilik hoquqi namliq yighindin körünüsh. 2016-Yili 12-dékabir, myunxén.
RFA/Ekrem

12-Dékabir bawariye parlaméntida "Ilham toxti we Uyghurlarning kishilik hoquqi" namliq xelq'araliq yighin ötküzüldi.

Bu qétimqi yighin'gha amérika, gérmaniye, kanada, teywen, gollandiye, bélgiye, firansiye, en'gliye qatarliq ellerdin kelgen kishilik hoquq mutexessisliri, pa'aliyetchiler, siyasiyonlar, bawariye parlaméntining millet wekilliri, myunxéndiki Uyghur jama'iti, her sahe muxbirlar bolup 80 ge yéqin kishi qatnashti.

Yighin chüshtin burun sa'et 11:00 da bawariye parlaméntida bashlandi. Yighin'gha yéshillar partiyisining re'isi margarita bawzé xanim sahibxaniliq we riyasetchilik qildi. Sa'et 15:30 gha qeder 4 sa'et dawamliship axirlashqan bu yighinda jem'iy 24 neper kishilik hoquq pa'aliyetchisi söz qildi. Ularning söz témisi, Uyghurlarning nöwettiki weziyiti, ilham toxti mesilisi, xitaydiki insan heqliri depsendichilikige merkezleshti.

Ilham toxti guruppisining mes'uli enwerjan ependi bu qétimqi yighinning kütkinidikidinmu netijilik bolghanliqini tilgha aldi. Uyghur siyasiy erbabliridin erkin alip tékin ependimu yighinning muweppeqiyitige yuqiri baha berdi. Ilham toxti guruppisining mes'ulliridin mari xolizman xanimmu yighin'gha bolghan ijabiy bahalirini tilgha élip ötti.

Bu qétimqi yighin'gha teywendin kélip qatnashqan we Uyghurlar hem xitay weziyiti toghriliq söz qilghan örkesh dölet ependimu, yighinning muweppeqiyitini mu'eyyenleshtürdi. Xitay démokratik herikitining wekilliridin shéng shö xanimmu bu yighin'gha yuqiri bahalar bérip, Uyghurlar mesilisini xelq'arada tonutush bilen birge, xitay xelqigimu tonutushning zörürlükini tilgha aldi. Xeter astidiki milletlerni qoghdash teshkilati asiya ishliri bölümining mes'uli ulrik délyus ependi hem yighinning netijilik bir yighin bolghanliqidin köp söyün'genlikini bildürdi.

Bu qétimqi yighinni ilham toxti guruppisi, xeter astidiki milletlerni qoghdash teshkilati, wakaletsiz milletler teshkilati we gérmaniye yéshillar partiyisi birlikte uyushturghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.