Торонто шәһиридики хитай консулханиси алдида наразилиқ намайиши өткүзүлди

Ихтиярий мухбиримиз гүлшән абдуқадир
2016-10-03
Share
kanada-5-iyul-namayish.jpg Канадалиқ уйғурлар “5-июл қирғинчилиқи” мунасивити билән намайиш өткүзди. 2015-Йили 5-июл.
RFA/Ruqiye

Дуня уйғур қурултийиниң чақириқиға асасән дуняниң һәрқайси дөләтлиридә яшайдиған уйғурлар һәр йили 1-өктәбир күни өзлири турушлуқ дөләтләрдики хитай әлчиханилириниң алдиға йиғилип, хитай һөкүмитигә болған наразилиқ намайишлири өткүзүп кәлмәктә.

Йиллардикигә охшашла, канаданиң торонто шәһиридә яшайдиған уйғурлар 1-өктәбир күни торонтодики хитай консулханиси алдиға йиғилип, наразилиқ намайиши өткүзүп хитай һөкүмити 67 йилдин буян йүргүзүватқан ассимилятсийә сияситиниң маһийитини канада хәлқигә аңлатти.

Намайишта, намайишни тәшкиллигән шәрқи түркистан сүргүндики һөкүмити, мәдәнийәт мәркизиниң муавин рәиси адил наразилиқ баянатнамисини оқуп өтти.

Баянатнамидә, “уйғур хәлқиниң бу қара күнни һәргиз әстин чиқармайдиғанлиқи, 1949-йили хитай һөкүмити мустәқил шәрқи түркистан җумһурийитини бесивалғандин кейин, сиясий, мәдәнийәт, тил, дин өрп адәт җәһәтләрдә қаттиқ қол сиясәт қоллиниш арқилиқ нурғунлиған уйғурларни тутқун қилғанлиқи, түрмиләргә ташлиғанлиқи вә қаттиқ қийин қистақларни елип барғанлиқи”, нәтиҗидә “ бүгүнки шәрқи түркистан үсти очуқ түрмигә айлинип қалғанлиқи” оттуриға қоюлди.

Намайишқа қатнашқан абдул әзиз әпәнди зияритимизни қобул қилип, өзиниң давамлиқ намайишқа қатнишип келиватқанлиқини билдүрди.

Һәр қетим торонтода өткүзүлүп келиватқан намайишқа, иран ишғалийити астидики җәнуби әзәрбәйҗан азадлиқ партийисиниң әзалириму қатнишип, өзлири билән тәқдирдаш болған уйғур хәлқиниң йенида туруп кәлди.

Шу күнки намайишқа қатнашқан җәнуби әзәрбәйҗан истиқлал партийәсиниң торонтодики вәкили яшар бозкурт, җәнуби әзәрбәйҗан истиқлал партийәсиниң әзалиридин оғуз вә ата қатарлиқлар зияритимизни, қобул қилип өзлириниң уйғур хәлқи билән тәқдирдаш икәнликини, һәр заман уйғурларниң йенида болидиғанлиқини билдүрди.

Яшар бозкурт әпәнди мундақ деди: “уйғурлар хитай ишғалийитидә, биз әзәрбәйҗанлиқлар иран ишғалийитидә яшап келиватимиз, биз уйғурлар билән тәқдирдаш. Биз һәр вақит уйғурларниң йенида туримиз.”

Шу күнки намайишқа канаданиң торонто шәһиридә яшаватқан таһир аилиси 3 оғли билән бирликтә қатнашқан болуп, зияритимизни қобул қилған таһир әпәнди, өзиниң бүгүн хитайға болған наразилиқини кәң-кушадә аңлитивалғанлиқи үчүн интайин хушал икәнликини билдүрди.

Шу күнки намайишқа канадаға кәлгинигә әмдила бир йил болған, бу йил 18 яшқа киргән мустәқил туйғунму қатнашқан болуп, у канадаға келип өзиниң көз қарашлирини мустәқил аңлитиш пурситигә еришкәнликидин интайин мәмнунлуқини билдүрди.

Намайишқа торонто шәһири вә әтрапида яшайдиған көп санда киши қатнашқан болуп, намайишчилар, “уйғурларға әркинлик, хитай вәтинимиздин чиқип кәт, хитай қирғинчилиқни тохтат, хитай террорист ”дегәнгә охшаш шоарларни товлиди.

1-Өктәбир шәнбә күни өткүзүлгән намайиш, торонто вақти чүштин кейин саәт 3 дә башлинип 5 әтрапида ахирлашти.

Бу программиниң тәпсилатини юқиридики улиништин аңлиғайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт