Ata mehbus qizining wapatidin, oghul mehbus özining jaza mudditidin xewersiz

Ayköl peyshenbebazarliq siyasiy tutqunlar (6)

Aqsu aykölning peyshenbebazar kentidiki siyasiy tutqunlar heqqide radiyomizgha yollan'ghan mektupta aldinqi yilqi qattiq zerbe bérish dolqunida bir a'ilidin ikki kishining türmige tashlinip, ikki kishining hayatidin ayrilghanliqidin bashqa yene, mehbus tursun mamutning qizi we newrisining wapatidin xewersiz ikenliki, ösmürler türmisidiki oghli mehbus ablikim tursunning bolsa özining qanche yil késilgenlikidin xewersiz ikenliki bayan qilin'ghan. Muxbirimiz bügün bu heqte aqsu ayköldiki saqchi we ahalilerdin melumat igilidi. Igilen'gen uchurlar, mektuptiki yuqiriqi déyilgenlerning toghriliqini delillidi.

Mezkur mektupta déyilishiche, mehbus tursun mamut qizi we newrisini dawalitalmayla qalmastin, u yene tughutta ölüp ketken qizi we ushtumtut aghriq bilen ölüp ketken newrisining ölüm murasimlirighimu qatnishalmighan, hetta, ularning ölümidinmu xewer tapmighan. Emma a'ilidiki bu paji'eni köngli tuyghan ata a'ilisige arqa - arqidin mektup yollap qizi, newrilirining ehwalini sorighan.

Mektupta yene déyilishiche, nöwette ürümchi ulanbaydiki ösmürler türmiside jazasini ötewatqan 17 yashliq ablikim tursunning qanche yil késilgenlikidin a'ilisimu, özimu xewersiz iken. Bu ata, bala mehbusning meschit sirtida topliship namaz oqughanliqi üchün késilgenliki ilgiri sürülgen mektupta, ular üstidin mexpiy sot échilghanliqi, emma sot hökümi heqqide a'ilisigimu, özlirigimu héchqandaq yazma uchur bérilmigenliki eskertilgen.

Biz bu uchurning toghriliqini delillesh üchün, aldi yene ayköl saqchixanisigha téléfon qilip, ablikim tursunning jaza mudditi heqqide melumat soriduq. Saqchi xadimi, özining bu heqte gep qilalmaydighanliqini éytti.

Özini ashkarilashni xalimighan ahalilerdin biri, tursun mamut we oghli bilen birlikte topliship namaz oqughan 17 - kent 1 - guruppidin 8 kishining nöwette türmide ikenlikini ashkarilidi, emma ularning kimliki heqqide melumat bermidi. Tursun mamutning ayali xasiyet xanim, birqanche ayning aldida ulanbaydiki ösmürler türmiside yétiwatqan oghlini yoqlap barghanliqini, emma oghliningmu özining jaza mudditidin xewersiz ikenlikini éytti.

Yuqiridiki ulinishtin ayköl peyshenbebazardiki siyasiy tutqunlar namliq chatma xewerning 6 - qismini anglaysiler.