ئويمانبايتوقايدىكى 41 نەپەر سىياسىي تۇتقۇندىن 18 نەپىرى قويۇپ بېرىلگەن

مۇخبىرىمىز شۆھرەت ھوشۇر
2016-04-01
Share
xoten-tutqun-partlash-qarshiliq.jpg ئۈرۈمچى، يەكەن قاتارلىق جايلاردا پارتلاش يۈز بەرگەندىن كېيىن، خىتاي ساقچىلىرىنىڭ ئۇيغۇرلارنى تۇتقۇن قىلىۋاتقان كۆرۈنۈشى. 2014-يىلى 27-ماي، خوتەن.
Oqurmen teminligen

غۇلجا ناھىيىسىنىڭ ئويمانبايتوقاي كەنتىدە 41 نەپەر كىشىنىڭ كومپارتىيە ئەزاسىنىڭ نەزىرىگە بارمىغانلىقى ئۈچۈن تۇتقۇن قىلىنغانلىقى ئۆتكەن ھەپتە دۇنياغا ئاشكارىلانغان ئىدى. مەلۇم بولۇشىچە، بۇلاردىن سالاھىدىن زامان قاتارلىق 18 نەپىرى مۇشۇ ھەپتىنىڭ چارشەنبە كۈنى قويۇپ بېرىلگەن.

مۇخبىرىمىز قويۇپ بېرىلگەنلەر ھەققىدە مەلۇمات ئىگىلەش داۋامىدا ئەينى چاغدا يەنى ئىككى ئاينىڭ ئالدىدا مەزكۇر 41 تۇتقۇننىڭ باشلانغۇچ مەكتەپتە ئوقۇۋاتقان بالىلىرىنىڭمۇ ساقچىخانا ئاپىرىپ سوراق قىلىنغانلىقى ۋە دىنىي پائالىيەتلەرگە قېتىلماسلىق ھەققىدە ئاگاھلاندۇرۇلغانلىقى ئاشكارىلاندى.

ئەھۋالدىن خەۋەردار كىشىلەر ردىيومىزغا مەكتۇپ يوللاپ ئويمانبايتوقايدا تۇتقۇن قىلىنغان 41 سىياسىي مەھبۇستىن 18 نەپىرىنىڭ قويۇپ بېرىلگەنلىكىنى مەلۇم قىلدى. بىز بۇ ئۇچۇرنىڭ توغرىلىقىنى ئېنىقلاش ئۈچۈن ئەڭ ئاۋۋال ئارائۆستەڭ يېزىلىق ساقچىخانىغا تېلېفون قىلدۇق. ساقچى خادىمى 18 نەپەر تۇتقۇننىڭ قويۇپ بېرىلگەنلىكىنى دەلىللىگەن بولسىمۇ، ئۇلارنىڭ نېمە ئۈچۈن قويۇپ بېرىلگەنلىكى، قالغانلىرىنىڭ نېمە ئۈچۈن تۇتۇپ تۇرۇلۇۋاتقانلىقى ھەققىدە مەلۇمات بېرىشنى رەت قىلدى.

ئويمانبايتوقايدىكى بىر مەھەللە باشلىقىمۇ سالاھىدىن زامان قاتارلىق 18 نەپەر تۇتقۇننىڭ قويۇپ بېرىلگەنلىكىنى ئاشكارىلىدى، ئەمما ئۇمۇ بۇلارنىڭ قويۇپ بېرىلىش سەۋەبىدىن خەۋەرسىز ئىكەنلىكىنى ئېيتتى.

يەنە بۇ مەھەللە باشلىقىنىڭ ئاشكارىلىشىچە، بۇنىڭدىن ئىككى ئاي ئاۋۋال مەزكۇر 41 مەھبۇس تۇتقۇن قىلىنغاندا ئۇلارنىڭ باشلانغۇچ مەكتەپتە ئوقۇۋاتقان بالىلىرىمۇ ساقچىخانىغا ئاپىرىپ سوراققا تارتىلغان ۋە ئۇلار دىنىي پائالىيەتكە قېتىلماسلىق ھەققىدە ئاگاھلاندۇرۇلغان. نارەسىدە بالىلارغا قارىتا ئېلىپ بېرىلغان بۇ سوراق ئۇلارنىڭ روھىي كەيپىياتىغا قاتتىق تەسىر قىلغان.

يەنە بىر ساقچى خادىمىنىڭ بايانلىرىدىن مەلۇم بولۇشىچە، ئىمام ئەنۋەر ھەسەن، مەزىن ئەكبەر نەسىردىن قاتارلىق 23 تۇتقۇن داۋاملىق ھالدا تۇتۇپ تۇرۇلماقتا. ئۇلار كومپارتىيە ئەزاسى ھارۇن دېگەن كىشىنىڭ نەزىرىگە بارمىغانلىقىدىن ئىبارەت ئاتالمىش جىنايىتى ئۈچۈن ئۇلارغا قانداق جازا بېرىلىدىغانلىقى ھازىرچە مەلۇم ئەمەس.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت