Norwégiyediki Uyghurlar xitaygha qarshi namayish sadalirini yangratti

Ixtiyariy muxbirimiz oghuzxan
2018.02.07
norwegiye-bextiyar-namayish-5-fewral.jpg Norwégiye Uyghur komitétining re'isi bextiyar ömer ependi “5-Féwral ghulja weqesi” ni xatirilesh namayishida söz qilmaqta. 2018-Yili 5-féwral, oslo.
RFA/Oghuzxan

5-Féwral küni ap'aq qar libasigha chömülgen shimaliy yawropadiki norwégiyede Uyghur jama'itining xitaygha qarshi naraziliq sadaliri yene yangridi.

Shu küni norwégiye paytexti oslodiki xitay elchixanisi aldigha yighilghan Uyghur namayishchilar qollirida ay-yultuzluq kök bayraqni jewlan qildurup, buningdin 21 yil burunqi “5-Féwral ghulja weqesi” ni xatirilidi shundaqla xitay hökümitining Uyghur diyarida yürgüzüwatqan insan qélipidin chiqqan zulumigha naraziliq bildürdi.

Bu qétimqi namayish norwégiye Uyghur komitétining teshkillishi, “Norwégiye Uyghur islam medeniyet merkizi” ning hemkarlishishi bilen élip bérildi. Namayishqa paytext oslo we yéqin etraptiki sheherlerdin kelgen 60 qa yéqin kishi qatnashti.

Namayishta norwégiye Uyghur komitéti yasighan lozunka we plakatlar namayishchilarning qolliridiki ay-yultuzluq kök bayraqlar bilen qoshulup namayish meydanini ajayip heywetlik tüske kirgüzgen idi.

Dunya Uyghur qurultiyi ijra'iye komitétining mu'awin re'isi semet abla ependi namayish bashlinishi bilen söz qilip, “5-Féwral ghulja weqesi” heqqide tepsiliy melumat berdi hemde shu qétimqi weqede hayatidin ayrilghan shéhitlargha matem bildürdi.

Namayish dawamida norwégiye Uyghur komitétining re'isi bextiyar ömer ependimu söz qilip, namayishqa qatnashqan jama'etke rehmitini bildürdi we muhajirette yashawatqan Uyghurlarning nöwettiki weziyette qolidin néme kelse wetini we xelqi üchün shuni qilishi lazimliqini alahide tekitlidi.

Namayish axirida “Norwégiye Uyghur islam medeniyet merkizi” ning yétekchiliridin ömer hajim söz qilip, norwégiyediki Uyghur yashlirining weten üchün élip bérilghan namayishlargha aktipliq bilen qatnishishining meyli milliy yaki diniy mes'uliyet jehettin bir burch ikenlikini tekitlep ötti.

Namayish axirlashqandin kéyin jama'et oslodiki “Norwégiye Uyghur islam medeniyet merkizi” ning meschitide jem bolup, merhum diniy alim muhemmed salih damolla hajim üchün ghayibane jinaza namizi oqudi.

Programmining tepsilatini yuqiriqi awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.