Rabiye qadir xanimning perzentliri we newrilirining midong rayonidiki “Terbiyilesh merkizi” de ikenliki ashkarilandi

Dunya Uyghur qurultiyining re'isi rabiye qadir xanim tünügün amérika dölet mejliside échilghan Uyghur weziyiti heqqidiki guwahliq yighinida qilghan sözide özining ürümchide qépqalghan perzentlirining yéqinda qaytidin tutqun qilin'ghanliqi, tutqunlarning arisida newriliriningmu barliqini melum qildi. Muxbirimiz bügün bu yip uchigha asasen ürümchidiki herqaysi saqchixanilardin melumat igilidi. Saqchilarning köpinchisi ehwal heqqide melumat bérishtin özini qachurdi, emma héchqaysisi uchurni ret qilmidi. Ikki saqchi xadimi rabiye qadir xanimning a'ile-tawabi'atlirining ürümchi midong rayonluq “Terbiyilesh merkizi” de ikenlikidin xewiri barliqini ashkarilidi.

Rabiye qadir xanimning bayan qilishiche, Uyghur rayonida bu yil bashlan'ghan “Qattiq zerbe bérish” dolquni we “Yépiq terbiye” herikiti dawamida uning bezi qérindashliri we bir qisim newre tughqanliri tutqun qilin'ghan idi. Yéqinda, yeni 19‏-qurultaydin awwal uning ürümchide qépqalghan perzentliri we newriliridin 11 kishi tutup kétilgen.

Biz bu ehwalni éniqlash üchün aldi bilen rabiye xanimning perzentliri olturushluq tewelikke, yeni ürümchidiki at beyge meydani saqchixanisigha téléfon qilduq. Saqchixana xadimi ehwal heqqide melumat bérishni ret qildi. Emma u rabiye xanimning perzent we newrilirining tutulghanliq uchurini inkar qilmidi.

Rabiye xanimning a'ile-tawabi'ati tewe bolghan saqchixanilardin biri nen'güen saqchixanisi. Bu saqchixana xadimi ehwal heqqide axbarat ziyariti qobul qilalmaydighanliqini éytti؛ bu xadim yene ehwal heqqide tekrar téléfon qilmasliqimizni éytti. Sewebini ichkirilep sorighinimizda, ular özlirining bu so'alimiz heqqide öz rehberliridin melumat sorighanliqini we rehberlerning bu uchur dölet mexpiyetlikige yatidighanliqi üchün téléfonda jawab bermeslikni buyrughanliqini éytti. Téléfonimizni qobul qilghan nenzigo saqchixanisining bir xadimi, rabiye xanim a'ile-tawabatining midong rayonluq “Terbiyilesh merkizi” de ikenlikini tilgha aldi, emma tepsiliy melumat bermidi. Biz midong rayonluq “Terbiyilesh merkizi” heqqide uchur élish üchün baxulyang saqchixanisigha téléfon qilduq. Saqchi xadimi mezkur merkez heqqide melumat bérishni ret qildi. Biz yene ürümchi shehirining tengritagh rayonluq saqchi idarisige téléfon qilduq. Saqchi xadimi rabiye qadir xanimning perzentliri we newrilirining midong rayonluq “Terbiyilesh merkizi” de ikenlikidin xewiri barliqini ashkarilidi. 

U, qanche kishi, néme üchün we qachan tutulghanliqi heqqidiki so'allirimizgha jawaben déloning tepsilatidin xewersizlikini bildürdi. U yene rabiye xanimning perzentlirini nen'güen saqchixanisining tutqanliq éhtimalliqini ilgiri sürdi. U ziyaritimizning axirida rabiye xanim a'ile-tawabi'atlirining midong rayonida tutup terbiyeliniwatqandin bashqa héchnerse bilmeydighanliqini bayan qildi. 

Biz bu uchurgha érishkendin kéyin midong rayonidiki saqchi orunlirigha téléfon qilduq. Saqchixana xadimliri ehwaldin xewersizlikini éytti we midong rayonluq “Terbiyilesh merkizi” heqqide uchur bérishnimu ret qildi. 

Rabiye xanimning bayan qilishiche, uning xoten, aqsu we kucha qatarliq jaylardiki qérindashliri we ularning perzentliri bilen qoshup hésablighanda, a'ile-tawabatliridin 30 nechche kishi qamaq we “Terbiyilesh merkezliri” de tutup turulmaqta.