Өстәңдә өлгән бала 20 қетим лагерға апирилған болсиму, әмма ата-аниси билән көрүштүрүлмигән

Мухбиримиз шөһрәт һошур
2018-12-31
Share
qaraqashtiki-tonglap-olgen-bala-01.jpg Қариқашта өстәңгә чүшүп кетип қаза қилған бала.
Social Media

Қарақашниң зава йезисида өстәңгә чүшүп кетип һаятидин айрилған икки яшлиқ бала һәққидики әһвал игилишимиз давамида балиниң ата-анисиниң бир вә бир йерим йилдин буян қарақаштики бостанкөл лагерида икәнлики; бовиси билән момисиниң 76 вә 78 яшта икәнлики айдиңлашти. Мәлум болушичә, балиниң момиси вә бовиси балини ата-аниси билән көрүштүрүш үчүн өзлириниң саламәтликиниң начарлишип кетиватқанлиқини сәвәб қилип көрситип, бостанкөл лагериға йеқинқи икки ай ичидә 20 қетим барған. Уларниң көрүшүш илтимасиға наһийилик җ х идариси қатарлиқ 4 орунниң тамғиси бесилған болсиму, әмма бу илтимас лагер башқурғучилар тәрипидин рәт қилинған.

Қарақаш наһийисиниң зава йеза чокан җилға кәнтидә өстәңгә чүшүп кетип һаятидин айрилған икки яшлиқ бала һәққидә иҗтимаий таратқулардики учурларда дейилишичә, исми рәхмитулла ширбақи болған бу бала 21‏-декабир күни ғайиб болған вә 24‏-декабир күни җәсити өстәңдин байқалған.

Биз чокан җилға кәнтидә 2 яшлиқ балиниң өстәңгә чүшүп кетип җан үзгәнлики дәлилләнгәндин кейин, униң аилә әһвали һәққидә давамлиқ мәлумат сүрүштә қилдуқ. Ениқлашлиримиз давамида дадисиниң 1 йерим йилдин буян, аписиниң болса бир йилдин буян лагерда икәнлики ашкариланди. Сақчи хадимлиридин бириниң дейишичә, икки яшлиқ рәхмитулланиң дадиси ширбақи телефондин мәсилә чиқип лагерға әкетилгән; әмма аписиниң немә сәвәбтин әкетилгәнлики һазирчә мәлум әмәс.

Алақидар кәнт аяллар мудириниң ашкарилишичә, рәхмитуллаға қараватқан бовисиниң исми мәтнури мәхсут 78 яш; момиси мәһдумхан турсуннияз 68 яш болуп, булар икки яшлиқ нәврисини ата-аниси билән көрүштүрүш вә өзлириму лагердики оғул вә келинини көрүвелиш мәқситидә саламәтликиниң начарлап кетиватқанлиқини сәвәб қилип көрситип, бостанкөл йиғивелиш мәркизигә йеқинқи 2 йил ичидә 20 қетим барған вә көрүшүш илтимаси сунған. Мәзкур бовай-момай өзлириниң көрүшүш илтимасиға кәнт аһалиләр комитети, йезилиқ сақчихана, наһийилик әдлийә идариси вә наһийилик җ х идариси қатарлиқ орунларниң тамғисини бастурған болсиму, тәләп изчил һалда рәт қилинған.

Кәнт аяллар мудириниң мәлум қилишичә, қарақаш наһийилик җ х идарисиниң муавин башлиқи ясинҗан дегән кишиниң тәстиқ имзасиму карға кәлмигән. Мәлум болушичә, 2 яшлиқ рәхмитулла әң ахирқи қетим 18‏-декабир )чаршәнбә( күни, йәни җәсити тепилиштин бир һәптә бурун, бова-момиси билән бирликтә бостанкөл лагериға ата-анисини көрүш үчүн елип берилған, әмма лагер башқурғучилири уларға өйигә қайтип телефон күтүшни тәвсийә қилип, уларниң көрүшүш тәлипини йәнә рәт қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт