Östengde ölgen bala 20 qétim lagérgha apirilghan bolsimu, emma ata-anisi bilen körüshtürülmigen

Muxbirimiz shöhret hoshur
2018-12-31
Share
qaraqashtiki-tonglap-olgen-bala-01.jpg Qariqashta östengge chüshüp kétip qaza qilghan bala.
Social Media

Qaraqashning zawa yézisida östengge chüshüp kétip hayatidin ayrilghan ikki yashliq bala heqqidiki ehwal igilishimiz dawamida balining ata-anisining bir we bir yérim yildin buyan qaraqashtiki bostanköl lagérida ikenliki؛ bowisi bilen momisining 76 we 78 yashta ikenliki aydinglashti. Melum bolushiche, balining momisi we bowisi balini ata-anisi bilen körüshtürüsh üchün özlirining salametlikining nacharliship kétiwatqanliqini seweb qilip körsitip, bostanköl lagérigha yéqinqi ikki ay ichide 20 qétim barghan. Ularning körüshüsh iltimasigha nahiyilik j x idarisi qatarliq 4 orunning tamghisi bésilghan bolsimu, emma bu iltimas lagér bashqurghuchilar teripidin ret qilin'ghan.

Qaraqash nahiyisining zawa yéza chokan jilgha kentide östengge chüshüp kétip hayatidin ayrilghan ikki yashliq bala heqqide ijtima'iy taratqulardiki uchurlarda déyilishiche, ismi rexmitulla shirbaqi bolghan bu bala 21‏-dékabir küni ghayib bolghan we 24‏-dékabir küni jesiti östengdin bayqalghan.

Biz chokan jilgha kentide 2 yashliq balining östengge chüshüp kétip jan üzgenliki delillen'gendin kéyin, uning a'ile ehwali heqqide dawamliq melumat sürüshte qilduq. Éniqlashlirimiz dawamida dadisining 1 yérim yildin buyan, apisining bolsa bir yildin buyan lagérda ikenliki ashkarilandi. Saqchi xadimliridin birining déyishiche, ikki yashliq rexmitullaning dadisi shirbaqi téléfondin mesile chiqip lagérgha ekétilgen؛ emma apisining néme sewebtin ekétilgenliki hazirche melum emes.

Alaqidar kent ayallar mudirining ashkarilishiche, rexmitullagha qarawatqan bowisining ismi metnuri mexsut 78 yash؛ momisi mehdumxan tursunniyaz 68 yash bolup, bular ikki yashliq newrisini ata-anisi bilen körüshtürüsh we özlirimu lagérdiki oghul we kélinini körüwélish meqsitide salametlikining nacharlap kétiwatqanliqini seweb qilip körsitip, bostanköl yighiwélish merkizige yéqinqi 2 yil ichide 20 qétim barghan we körüshüsh iltimasi sun'ghan. Mezkur boway-momay özlirining körüshüsh iltimasigha kent ahaliler komitéti, yéziliq saqchixana, nahiyilik edliye idarisi we nahiyilik j x idarisi qatarliq orunlarning tamghisini basturghan bolsimu, telep izchil halda ret qilin'ghan.

Kent ayallar mudirining melum qilishiche, qaraqash nahiyilik j x idarisining mu'awin bashliqi yasinjan dégen kishining testiq imzasimu kargha kelmigen. Melum bolushiche, 2 yashliq rexmitulla eng axirqi qétim 18‏-dékabir )charshenbe( küni, yeni jesiti tépilishtin bir hepte burun, bowa-momisi bilen birlikte bostanköl lagérigha ata-anisini körüsh üchün élip bérilghan, emma lagér bashqurghuchiliri ulargha öyige qaytip téléfon kütüshni tewsiye qilip, ularning körüshüsh telipini yene ret qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet