Муһаҗирәттики уйғур аяллири қозғалмақта

Ихтиярий мухбиримиз әкрәм
2018-01-24
Share
bir-awaz-bir-qedem.jpg "бир аваз, бир қәдәм" гурупписиниң логоси.
RFA/Ekrem

Хитайниң уйғур дияридики еғир бастурушлиридин ғәзәпләнгән чәтәлләрдики уйғурлар түрлүк шәкилләрдә қаршилиқ көрсәтмәктә.

Хитайниң уйғур диярида йүргүзүватқан чекидин ашқан бастуруш сиясәтлири муһаҗирәттики уйғурларниң бирлик, иттипақлиқиға түрткә болуш билән биргә, уларни түрлүк шәкилләрдә қаршилиқ көрситишкә мәҗбурлаватқанлиқи аян болмақта.

Йеқинда дуняниң һәрқайси җайлиридики уйғур аяллири өз-ара алақиләрдә болуп, иҗтимаий таратқуларда "бир аваз, бир қәдәм" топини қуруп, 3-айниң 15-күни б д т вә һәрқайси дөләтләрдики һөкүмәт биналири алдида бирла күндә аялларни асас қилған һалда "үн-түнсиз етираз билдүрүш" намайиш тәшкиллимәкчи болған. Дуня уйғур қурултийи буниңға әһмийәт билән қарап, 22-январ елан қилған "явропа парламенти алдида 5 миң кишилик намайиш чақириқи" да, пүтүн дунядики уйғур тәшкилатлирини уйғур аяллириниң бу пидакарлиқ роһини қизғин қоллаш вә мәдәт беришкә чақирған.

Муһаҗирәттики уйғур аяллири арисида "бир аваз, бир қәдәм" һәрикитини қозғаш тәшәббусини оттуриға қойған вә мәзкур һәрикәтниң йетәкчилиридин бири болған америкидики уйғур зиялийси сүрәййә ханим бу һәқтә тохталғанда, бу һәрикәтниң хитай зулумиға сәвр-тақити қалмиған уйғур аяллириниң ортақ ирадиси икәнликини тилға алди.

"бир аваз, бир қәдәм" һәрикитиниң йетәкчилиридин бири болған америкидики уйғур зиялийси рошән аббас ханим бундақ бир һәрикәтни қозғашқа түрткә болған амил вә бу гуруппиниң қурулуш мәқсити һәққидә тохтилип, уйғур аяллириниңму өз мәҗбурийәтлирини ада қилиш вә өз җасарәтлирини намаян қилишниң вақти кәлгәнликини тилға алди.

Германийәдики уйғур зиялийси пәридә ханимму бу һәқтә тохтилип, уйғурларни хитай зулуминиң бирләштүрүватқанлиқини, уйғур аяллириниңму сәври-тақәтлириниң чекигә йәткәнликини ипадә қилди. У сөзидә "бир аваз, бир қәдәм" һәрикитиниң ғәпләт ичидики уйғурларни ойғитишни мәқсәт қилидиғанлиқини вә бу һәрикәтниң истиқбалиға үмид билән қарайдиғанлиқини билдүрди.

"бир аваз, бир қәдәм" топидики инкаслардин, аялларниң бу һәрикәткә толиму һаяҗан билән аваз қошуватқанлиқи мәлум болмақта.

Мәлум болушичә, бу һәрикәт сепигә 10 дин артуқ дөләттин йүзләрчә ханим-қизлар қошулған болуп, бу қошун барғансери зорийип бармақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт