73 яшлиқ ғайиб әрздар ели ришитниң дахийән түрмисидә икәнлики айдиңлашти

Мухбиримиз шөһрәт һошур
2015-02-09
Елхәт
Пикир
Share
Принт
Бир оғли мәлум бир хитай тәрипидин пичақлинип өлтүрүлгән бир бовай, қатил қолға илинип узун мәзгил өтмәйла қоюп берилгәндин кейин 9 йилдин артуқ әрз қилған. 2009-Йили 23 апрел.
Бир оғли мәлум бир хитай тәрипидин пичақлинип өлтүрүлгән бир бовай, қатил қолға илинип узун мәзгил өтмәйла қоюп берилгәндин кейин 9 йилдин артуқ әрз қилған. 2009-Йили 23 апрел.
RFA

Пичан йеңийәрлик әрздар ели ришит бултур иккинчи айда сақчилар тәрипидин өйидин тутуп кетилгәндин кейин, из-дерики болмай кәлгән иди. Икки һәптиниң алдида радиомизға бу һәқтә мәлумат бәргән мәзкур әрздарниң оғли бүгүн мухбиримизниң зияритини қайта қобул қилип, өткән һәптиниң ахири ғайиб дадиси билән көрүшүш пурситигә еришкәнликини мәлум қилди. Мәлум болушичә, әрздар ели ришит нөвәттә дахийән түрмисидә икән. Бир йилдин буян тунҗи қетим дадисини көрүш несип болған оғул, дадисиниң көзиниң түрмидә техиму начарлашқанлиқини, кишиләрни пүтүнләйла тонумас һалға кәлгәнликини байқиған. Йәнә ашкарилинишичә, әрздарниң адвокати әрздарниң оғлиға әрзни тохтитип, дадисини кепилликкә елип чиқиш тәклипини сунған, әмма оғул дадисини кепилликкә елип чиқиш үчүн әһвални чүшәндүридиған орун вә шәхсләрни тапалмиған.

Биз икки һәптиниң алдида, 73 яшлиқ әрздар ели ришитниң бир йилниң алдида өйидин тутуп әкетилгәнлики, әмма аилисиниң һазирғичә из-дерикини алалмайватқанлиқи һәққидә хәвәр бәргән идуқ, мәзкур аилә билән бүгүн қайта көрүшүшимиз давамида, униң турпандики дахийән түрмисидә икәнлики айдиңлашти.

Мәлум болушичә, мәзкур аилә әрздар ели ришитни түрмидин кепилликкә ачиқишни пиланлимақта, әмма аилиниң әмәлдарлар қатлимида һечқандақ алақә тори болмиғачқа, нәгә бериш, кимгә әһвал ейтишни билмәй гаңгиримақта. Баян қилинишичә, даириләр йеқинқи 20 йилдин буян, әрздар ели ришитни әрздин тохтитип болалмиғандин кейин, униң аилә-тавабиатлиридин өч елип, уларға түрлүк аваричиликләрни туғдурған.

Мәзкур оғул бу қетим дадиси билән көрүшкәндин кейин, униң бейҗиңда мәркизи интизам тәкшүрүш идариси алдидики бир әрздарлар намайишиға қетилғачқа, җәмийәт тәртипини бузуш билән әйиблинип 5 йиллиқ кесилгәнликидин хәвәр тапқан.

Бу йил 73 яшқа киргән, пичан йеңийәрлик ели ришит, 20 йилниң алдида кичик бир иҗтимаий җедәлгә четилип қелип тутқун қилинған, сорақ вә қийнаш давамида униң бир көзигә ток калтәк тегип, шу көзи кардин чиққан, сорақ ахирида ели ришит гунаһсиз дәп қарилип қоюп берилгән, әмма униңға һечқандақ төләм берилмигән, шуниң билән ели ришитниң 20 йилға созулған әрз сәпири башланған иди.

Пикирләр (0)
Share
Толуқ бәт