Ürümchi tömüryol idarisi tewelikide yüz bergen pichaqliq hujumda 3 kishi yarilan'ghan, bir kishi ölgen

Tünügün yeni 11 ‏-mart küni kech sa'et 6 mezgilide, ürümchi shehirining yéngisheher rayonidiki tömüryol idarisi tewelikide bir meydan qanliq weqe yüz bergen.

Melum bolushiche, weqede ikki neper pida'iy néfit saray binasi aldida kétiwatqan xitay köchmenlirige pichaqliq hujum qilghan؛ hujumda xitay köchmenliridin 3 nepiri yarilan'ghan. Etrapta wezipe ötewatqan xitay saqchiliri derhal oq chiqirip pida'iylardin bir nepirini étip tashlighan we yene bir nepirini esir alghan. Weqe heqqide xitay j x tarmaqliri deslepte torda qisqa bir uqturush chiqarghan bolsimu, uzun ötmey uchurni öchürüwetken.

Biz ijtima'iy taratqularda chiqqan bu heqtiki bir yip uchigha asasen, eng awwal ürümchi sheherlik tömüryol idarisi tewelikidiki saqchi idarisige téléfon qilduq.

Nöwetchi xadim weqe heqqide tepsiliy melumat bermigen bolsimu, ema weqening yüz bergenlikini ret qilmidi. U weqening xénen yoli saqchixanisigha yéqin yerde yüz bergenlikini éytti, biz bu saqchixanigha téléfon qilghinimizda, weqening ergung saqchixanisidin 500 métir uzaqliqta we shu yerdiki néfit sariyi binasining udulida yüz bergenliki ashkarilandi. Xitay saqchiliri bu weqe heqqidimu melumat bérishtin özlirini tartti. Ularning gep arisida ashkarilishiche, weqede az dégende 3 kishi yarilan'ghan we bir kishi ölgen. Saqchi terep weqe sadir qilghuchilarning kimliki heqqide melumat bérishni izchil halda ret qildi.

Ahalilerdin birining bayanliridin melum bolushiche, pida'iylarning Uyghur rayonining jenubidin kelgenliki we ularning emdila 17-18 yashning qarisini alghan yashlar ikenliki melum. Uchur igileshlirimiz dawamida weqede yarilan'ghuchilarning kimliki, yarilinish derijisimu éniqlanmidi؛ emma weqening shekli, orni we rayonning weziyitidin qarighanda, hujumning xitay köchmenlirige qarshi bir zerbe bérish yaki ürkütüsh herikiti ikenliki we hujumda yarilan'ghan 3 yaridarning xitay ikenliki melum.

Özini ashkarilashni xalimighan bir guwahchining bayan qilishiche, rayonda yüz bériwatqan zulum we zorawanliqlar, bir türküm Uyghur yashlirini jénini aliqinigha élip qarshiliq körsitishke mejburlimaqta. Bu kishining yene bayan qilishiche, pida'iylar belkim bu herikiti arqiliq béyjingda échiliwatqan ikki yighindiki saxta doklatlargha reddiye bermekchi we yaki ürümchidiki we ürümchige qarap kéliwatqan xitay ölkiliridiki xitay köchmenlirige Uyghur rayonining köchmenler üchün tinch bir jay emesliki heqqide signal bermekchi.

Tepsilatini yuqiriqi awaz ulinishidin anglighaysiler.